سربراہ پاک فضائیہ نے قائداعظم محمد علی جناح کے یومِ ولادت اور کرسمس کے موقع پر پیغام جاری کیا ہے۔

ائیرچیف مارشل ظہیر احمد بابر سدھو نے بابائے قوم محمد علی جناح کو اپنے پیغام میں خراجِ عقیدت پیش کرتے ہوئے کہا کہ بابائے قوم ایک باکمال ذہنی استعداد، منصفانہ نقطۂ نظر، مضبوط کردار اور دلکش شخصیت کے حامل عظیم رہنما تھے۔

سربراہ پاک فضائیہ نے کہا کہ قائداعظم اعلیٰ بصیرت کے مالک اور دور اندیش انسان تھے۔ انھوں نے اپنے زریں اصولوں اتحاد، ایمان اوریقینِ محکم سے مسلمانان پاک و ہند کو متحد کیا اورایک الگ وطن حاصل کرنے میں کامیاب ہوئے۔

ائیرچیف مارشل ظہیر احمد بابرسدھو نے کہا کہ پاکستان ائیر فورس کے لئے قائد کے تصور “سیکنڈ ٹو نن” کےعین مطابق موجودہ دنیا کی غیر یقینی صورتحال میں ہمیں اپنی استعداد بڑھانی ہوگی۔

اپنے پیغام میں سربراہ پاک فضائیہ نے کہا کہ محنت، جانفشانی اورغیرمتزلزل حوصلے سے پاک فضائیہ کے جوان اپنی فضائیہ کوعظمت اوربرتری کی نئی رفعتوں سے ہمکنار کر سکتے ہیں۔ مجھے فخر ہے کہ پاک فضائیہ ایک شاندار تاریخ کی حامل اور ہمیشہ قوم کی توقعات پر پوری اتری ہے۔

ائیرچیف مارشل ظہیر احمد بابر سدھو نے کہا کہ کرسمس کے تہوار کے موقع پر مسیحی برادری کو دلی مبارکباد پیش کرتا ہوں۔ پاکستان اور پاکستان ائیر فورس کے لئے مسیحی برادری کی خدمات قابلِ ستائش اور باعثِ فخر ہیں۔