پاکستان کرکٹ ٹیم کے سابق ٹیسٹ فاسٹ بولر اور 1992 ورلڈ کپ کی فاتح ٹیم کا حصہ رہے، عاقب جاوید نے چیئرمین پاکستان کرکٹ بورڈ (پی سی بی) رمیز راجا کو دو چیزیں چھوڑنے کےلیے تجویز دے دی۔

تفصیلات کے مطابق نجی ٹی وی کے پروگرام میں  گفتگو کے دوران عاقب جاوید نے کہا کہ خدارا چیئرمین پی سی بی اب دو چیزیں چھوڑ دیں، ایک 1992ء ورلڈ کپ اور دوسرا عمران خان کی قیادت کی مثال دینا۔

49 سالہ سابق کرکٹر نے مزید کہا کہ اب ہمیں آگے دیکھنا چاہیے، 1992 کا پانچواں ورلڈکپ اب ماضی کا قصہ بن چکا جبکہ عمران خان ایک بہترین کپتان تھے، اس میں کوئی شک نہیں، البتہ ہر کوئی ان جیسا نہیں لگ سکتا، نا بن سکتا ہے۔

عاقب جاوید نے یہ بھی استفسار کیا کہ عمران خان جیسی شخصیت اور قیادت کوئی دوسرا کیسے کر سکتا ہے؟

سابق فاسٹ بولر نے بھارتی کپتان مہندرا سنگھ دھونی اور سارو گنگولی کا نام لیتے ہوئے سوال کیا کہ وہ عمران خان جیسے کپتان کیسے بن سکتے ہیں؟ لہٰذا ہمیں اب اس طرح کی باتیں کرنا چھوڑ دینا چاہیے۔

عاقب جاویدنے کہا کہ بابر اعظم بورڈ کی سطح پر تبدیلی اور ٹیم مینجمنٹ بدلنے کے بعد بہتر فیصلے کرتے دکھائی دے رہے ہیں۔

عاقب جاوید نے کہا کہ درست رمیز حسن راجا کے چیلنجز ابھی ان کے منتظر ہیں، البتہ انھیں بورڈ کی سطح پر معاملات درست انداز میں چلا نے کے لئے عملی اقدامات کےساتھ ایسے فیصلے کرنے ہو ں گے، جو مثال بنیں۔

چیئر مین پی سی بی رمیز راجہ کی جانب سے ’ڈراپ ان پچز‘ کے آئیڈیا کی مخالفت کرتے ہو ئے عاقب جاوید بولے ایسی پچز ان اسٹیڈیمز میں نصب کی جا تی ہیں، جہاں ایک سے زیادہ کھیل منعقد ہوتے ہیں، پاکستان میں اس فارمولے کے متعلق ان کی بات سمجھ سے باہر ہے۔