آغا رفیع اللہ نے کہا ہے کہ عمر زادہ اور خدا دوست دونوں پیپلز پارٹی ملیر کے کارکنان تھے۔

پیپلز پارٹی کے ملیر سے ایم این اے و رہنما  آغا رفیع اللہ نے بول نیوز سے گفتگو کرتے ہوئے کہا ہے کہ میرے دونوں قریبی ساتھیوں کو لینڈ گریبرز نے حملہ کرکے ٹارگٹ کیا۔

انہوں نے کہا کہ ملیر میں لینڈ گریبرز سرکاری زمینوں پر قبضہ کرنا چاہتے تھے پیپلز پارٹی کارکنان نے انکو روکا تھا ، کے ڈی اے سمیت دیگر سرکاری محکموں نے بھی لینڈ گریبرز کے خلاف ایف آئی آر درج کرا رکھی ہے۔

پیپلز پارٹی کے ملیر سے ایم این اے و رہنما نے کہا کہ پولیس نے کارروائی نہیں کی تو اب میرے قریبی ساتھیوں کو ملزمان نے فائرنگ کرکے ہلاک کردیا۔

آغا رفیع اللہ نے کہا کہ وزیراعلیٰ سندھ مراد علی شاہ، ایڈمنسٹریٹر کراچی مرتضیٰ وہاب، وزیر بلدیات ناصر شاہ اور وزیراطلاعات سندھ سعید غنی نے رابطہ کیا ہے۔

انہوں نے کہا کہ وزیراعلیٰ سندھ نے ملزمان کے خلاف کارروائی کی ہدایت کی ہے۔

واضح رہے کہ کراچی کے علاقے قائد آباد میں مرغی خانہ اسٹاپ کے قریب فائرنگ کا افسوسناک واقعہ پیش آیا تھا۔

   فائرنگ سے ایک شخص جاں بحق  اور ایک زخمی ہوگیا جبکہ لاش اور زخمی شخص کو جناح اسپتال منتقل کردیا گیا۔

پولیس حکام کا کہنا تھا کہ جاں بحق ہونے والے شخص کی شناخت خدا دوست ولد شاہ پرسان کے نام سے ہوئی۔

دوسری جانب زخمی ہو نے والے شخص کی شناخت عمر زادہ ولد صاحب زادہ کے نام سے ہوئی۔