شاید آپ کو یقین نہ آئے لیکن یہ سچ ہے کہ مصنوعی ذہانت پر مبنی ایک سافٹ ویئر کی جانب سے تیارکردہ ڈجیٹل پینٹنگ کے چھ شاہکار 13 لاکھ ڈالر میں فروخت کئے گئے ہیں۔

مصنوعی ذہانت، مشین لرننگ اور جدید سافٹ ویئر پر مبنی ّبوٹو نامی سافٹ ویئر کی تمام تخلیقات کو بطور این ایف ٹی نیلام کیا گیا ہے۔ این ایف ٹی یا نان فنجیبل ٹوکن ایسی ڈجیٹل تخلیقات کو کہا جاتا ہے جس کے حقوقِ ملکیت ایک شخص کے ہاتھ فروخت کردیئے جاتے ہیں۔

مجموعی طور پر بوٹو اب تک ہزاروں تصاویر اور شاہکار بنا چکا ہے لیکن اس نے رنگوں ، ایزل اور کینوس کی بجائے کمپیوٹر پر ہی  تصاویر ڈجیٹل انداز میں بناتا ہے۔ اگرچہ ایک انسانی مصور شاہکار بنانے میں مہینے اور سال تک لگادیتا ہے لیکن کمپیوٹر سافٹ ویئر یہی کام منٹوں میں کرتا ہے۔

اس کے لیے الگورتھم ( یعنی کمپیوٹر سافٹ ویئر) کو پہلے ہزاروں لاکھوں تصاویر اور شاہکار دکھائے جاتے ہیں۔ سافٹ ویئر سب کی تکنیک نوٹ کرتا رہتا ہے۔ اس کے بعد وہ اپنے ڈیٹا بیس اور مصنوعی ذہانت کی بنا پر خود سے تصاویر بنانے کے قابل ہوجاتا ہے۔

تین سو دن میں مجموعی طور پر کمپیوٹرپروگرام نے تین سو ڈجیٹل تصاویر بنائیں۔ ان میں سے چھ تصاویر کو ماہرین نے بیش قیمت قرار دیا ۔ اس کے بعد ان کی بولی شروع ہوئی اور انہیں پاکستانی روپوں میں تقریبا 23 کروڑ میں فروخت کیا گیا ہے۔