وزیراعظم آزاد جموں و کشمیر سردار عبدالقیوم نیازی نے کہا ہے کہ آج پاکستان کو وزیراعظم عمران خان کی صورت میں ایک عظیم رہنما میسر ہے۔

انہوں نے بانی پاکستان قائداعظم محمد علی جناح کے یوم پیدائش پر خصوصی پیغام دیتے ہوئے کہا کہ قائداعظم علیہ الرحمہ وہ عظیم رہنما تھے جنہوں نے برصغیر کا جغرافیہ بدل دیا اور مسلمانوں کے تشخص کا دفاع کیا۔

عبدالقیوم نیازی نے کہا کہ قائداعظم علیہ الرحمہ نے ایک نظریے کو سیاسی حقیقت کا روپ دیا، انکا عزم، ایمانداری اور نظم و ضبط کا درس ہمارے لئے مشعل راہ ہے۔

وزیراعظم آزاد کشمیر کا کہنا ہے کہ قائداعظم نے کشمیر کو پاکستان کی شہہ رگ قرار دیا، کشمیری عوام دیوانہ وار اپنے قائد پر فدا تھے، انکے دورہ سرینگر کے دوران کشمیریوں نے ان کا والہانہ استقبال کیا۔

انہوں نے مزید کہا کہ آج کشمیری عوام اپنے عظیم رہنماء کو خراج عقیدت پیش کرتے ہیں، آج پاکستان کو عمران خان کی صورت میں ایک عظیم رہنما میسر ہے۔

یہ بھی پڑھیں: صدر، وزیراعظم سمیت حکومتی شخصیات کا بابائے قوم کو خراجِ عقیدت

واضح رہے کہ بابائے قوم قائدِ اعظم محمد علی جناح کا یوم پیدائش آج ملک بھر میں قومی جوش و جذبے سے منایا جارہا ہے۔

بابائےقوم کی یوم پیدائش کے موقع پر سرکاری سطح پر پاکستان میں تعطیل ہے اور قائدِ اعظم محمد علی جناح  کو خراجِ تحسین پیش کرنے کے لیے خصوصی تقریبات ، سیمینارز ، کانفرنسز ، مذاکروں، مباحثوں کا انعقاد کیا گیا ہے۔

محمد علی جناح 25دسمبر 1876ء کو پیدا ہوئے،انہوں نے ابتدائی تعلیم کا آغاز 1882ء میں کیا، وہ 1893ء میں اعلیٰ تعلیم کے حصول کیلئے انگلستان روانہ ہوگئے وہاں سے انہوں نے 1896ء میں بیرسٹری کا امتحان پاس کیا اور وطن واپس آ گئے۔

جس کے بعد قائد اعظم محمد علی جناح نے سیاسی زندگی کا آغاز کرتے ہوئے انڈین نیشنل کانگریس میں باقاعدہ شمولیت اختیارکی لیکن کچھ عرصے بعد انہیں احساس ہوا کہ کانگریس صرف ہندوؤں کی نمائندہ جماعت ہے جہاں مسلمانوں کے ساتھ امتیازی سلوک برتا جاتا ہے،اس دوران انھوں نے خود مختار ہندوستان میں مسلمانوں کے سیاسی حقوق کے تحفظ کی خاطر مشہور چودہ نکات پیش کیے۔

قائدِ اعظم محمدعلی جناح کی زندگی جرات، ان تھک محنت، دیانت داری، عزمِ مصمّم ، حق گوئی کا حسین امتزاج تھی، برصغیر کی آزادی کے لیے بابائے قوم کا مؤقف دو ٹوک رہا، نہ کانگریس انھیں اپنی جگہ سے ہلا کسی نہ انگریز سرکار ان کی بولی لگا سکی۔