مردان میں حکومتی اُمیدوار سمیت اپوزیشن و آزاد امیدواروں کے اتحاد نے بلدیاتی الیکشن کو مسترد کرتے ہوئے الیکش کمیشن سے فوری نوٹس لینے کا مطالبہ کر دیا۔

مردان پریس کلب میں مشترکہ پریس کانفرنس میں جمیعت علماء اسلام کے میئر اُمیدوار امانت شاہ نے الزام عائد کرتے ہوئے کہا کہ منظم طریقے سے ہمارے ساتھ دھاندلی کی گئی۔

اس موقع پر پی ٹی آئی امیدوار لخکر خان، پیپلز پارٹی کے اسد کشمیری، آزاد اُمیدوار ظاہر شاہ بھی موجود تھے۔

مشترکہ پریس کانفرنس میں امیدواروں نے کہا  کہ مردان انتظامیہ و انتحابی عملہ میٸر تحصیل مردان کے نتاٸج تبدیل کرنے میں ملوث ہے، ہمیں بھاری ووٹ ملے تاہم مردان انتظامیہ و انتحابی عملے کی ملی بھگت سے راتوں رات نتاٸج تبدیل کرکے رات تین بجے تک ہم سے چار ہزار لیڈ پر پیچھے رہنے والے عوامی نیشنل پارٹی کے امیدوار کو جتوایا گیا جو سراسر ناانصافی پر مبنی اور جمہوریت پر ڈاکہ ڈالنے کے مترادف اقدام ہے۔

انہوں نے کہا کہ ہمارے پاس اپنا موقف ثابت کرنے کے مکمل ثبوت موجود ہیں، مردان انتظامیہ و انتحابی عملے سمیت دیگر جمہوریت دشمن قوتیں مل کر شفاف جمہوریت کا راستہ روک رہی ہیں، جس کے خلاف ہم عدالتوں سے رجوع کرنے کے علاوہ بھرپور احتجاج کریں گے۔

ان کا مزید کہنا تھا کہ ہمارے پاس جعلی ووٹوں و فارم 17 اور 18 میں کی جانے والی دھاندلی کے پکے ثبوت ہیں۔

پی ٹی آئی کے لخکر خان نے کہا کہ ہماری فتح کو شکست میں بدلنے کی ہر کوشش کے خلاف سخت مزاحمت کریں گے۔

ان کا کہنا تھا کہ کہ ہم خود ساختہ رزلٹ مسترد کرتے ہیں اور اگر ہمیں دیوار سے لگانے کی کوشش کی گٸی تو مردان انتظامیہ کے خلاف احتجاجی تحریک چلائیں گے۔