شہباز گل کا کہنا ہے کہ عمران خان کی ہرچیز اپنی ہے، کرپٹ لوگوں کا قد ان کے بوٹ کے تسموں سے زیادہ نہیں ہے۔

معاونِ خصوصی شباز گل نے مسلم لیگ ن کے رہنماؤں کو تنقید کا نشانہ بناتے ہوئے کہا کہ عمران خان کے بوٹ کے تسموں نے ان لوگوں کے گلے کے گرد احتساب کا پھندا ڈال دیا ہے۔ اس احتساب کے پھندے کی وجہ سے ان لوگوں کو سانس نہیں آرہیں۔

معاونِ خصوصی نے کہا کہ جہانگیر ترین پر الزام لگا جس کی انھوں نے تردید کی اور الزام جھوٹا ثابت ہوگیا۔ ان لوگوں نے جنوبی پنجاب میں عدالتی فیصلے کے خلاف شوگر مل لگائی۔ 10 ہزار روپے والے کیشئر کے اکاؤنٹ میں 2 ارب جمع ہوئے۔ اب ہم الزامات کو ثبوت کے ساتھ ثابت کریں یا یہ معافی مانگیں۔

انھوں نے کہا کہ او آئی سی میں پوری امت مسلمہ کے لیڈر پاکستان آئے۔ وزیراعظم نے او آئی سی وزرائے خارجہ کونسل میں افغانستان میں غربت اور بھوک کے مسئلے کو اجاگر کیا۔ وزرائے خارجہ کونسل میں افغانستان میں انسانی المیہ سے نمٹنے کے لیے فیصلے ہوئے ہیں۔ افغانستان ہمارا بھائی ہے ہم اس سے الگ نہیں ہوسکتے۔

معاونِ خصوصی شہباز گل کا کہنا تھا کہ ایک چینل روز مہنگائی کی خبریں چلاتا ہےکہ ملک میں سب مہنگا ہوگیا ہے۔ آج دنیا نئے پاکستان کے لیے کیے گئے اقدامات کی تعریف کررہی ہے۔