ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے کہا ہے کہ مریم اورنگزیب پروپیگنڈے کے بجائے آقاؤں کی کرپشن کا حساب دیں۔

ڈاکٹر شہباز گِل نے مریم اورنگزیب کے بیان پر ردِ عمل دیتے ہوئے کہا کہ نا اہلوں کی گھٹیا سیاست کا آر ٹی ایس عوام نے بٹھایا ہے، پاکستانی سیاست میں شریف خاندان اور ان کے درباریوں کی کوئی جگہ نہیں۔

ان کا کہنا تھا کہ عوام کا‏ تحریک انصاف حکومت پر مکمل اعتماد ہے، 3 دہائیوں تک ملک پر مسلط رہنے والے چور ڈاکوؤں کا بویا کاٹ رہے ہیں، مریم اورنگزیب پروپیگنڈے کے بجائے آقاؤں کی کرپشن کا حساب دیں۔

 انہوں نے کہا کہ مریم باجی بتائیں کہ اربوں کی کرپشن کر کے دوائی لینے والے کب واپس آ رہے ہیں؟ نا اہلوں کی حکومت میں ہی ملک کو بے یارو مدد گار چھوڑنے والے سمدھی وزیر خزانہ کب واپس آ رہے ہیں؟ جعلی نظریاتی سمدھی سمیت آکر پاکستانی عدالتوں کو عزت بخشنی چاہیے۔

 ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل کا مزید کہنا تھا کہ دھیلے کے کرپشن کی گردان والے ایف آئی اے کو 25 ارب کے جواب دیں، شہباز شریف کا ہر منصوبہ کرپشن اور کک بیکس کیلئے تھا۔

واضح رہے کہ ترجمان مسلم لیگ ن مریم اورنگزیب نے پریس کانفرنس کرتے ہوئے کہا تھا کہ نیب نیازی گٹھ جوڑ ایک دھیلے کی کرپشن ثابت نہیں کرسکے، شہزاد اکبر صاحب بڑے بڑے دعوے کیا کرتے تھے، ایک دھیلے کی کرپشن ثابت نہیں کرسکے، عمران خان صاحب اب اس تماشے کو بند ہونا چاہیے۔

انہوں نے کہا تھا کہ نیب کے بعد ایف آئی اے کو استعمال کیا گیا، عمران خان 3 سال سے عوام سے بدلہ لے رہے ہیں، شہباز شریف نے جو منصوبہ لگایا اس پر انکوائری کھولی گئی جس منصوبے سے عوام کا فائدہ ہوا اس پر کیس کھولا گیا۔

مسلم لیگ ن کی ترجمان نے کہا کہ ڈیلی میل آج بھی ہاتھ جوڑ کر شہباز شریف سے معافیاں مانگ رہا ہے ،ڈیلی میل کے ذریعے شہباز شریف کے خلاف اسٹوری پلانٹ کروائی گئی، آج عوام کی جیبوں پر ڈاکہ ڈالا جارہا ہے، 2018 میں نالائقوں اور اے ٹی ایمز کی حکومت بنی۔

مسلم لیگی رہنما کا کہنا تھا کہ حمزہ شہباز کو جیل میں ڈالا گیا، بشیر میمن صاحب کو کہا گیا مسلم لیگ ن کے لوگوں پر کیسز بناؤ، بشیر میمن صاحب نے کہا ان پر ایف آئی اے کے کیسز نہیں بنتے۔

مریم اورنگزیب نے کہا تھا کہ انہیں پاکستانی عوام کی کوئی فکر نہیں، آج ڈالر 180 روپے کا پہنچ گیا،عوام گیس، بجلی کے بل نہیں دے پارہی، یہ نالائق حکومت خود آٹا اور چینی چور مافیا ہے، شہباز شریف آپ کی نالائقیاں اور چوریاں سامنے لاتے رہیں گے۔

ان کا کہنا تھا کہ سوا سال گزر گیا بینکنگ کورٹ میں ایف آئی اے جواب نہیں جمع کروا سکی، جج صاحب کو کہا گیا ہمارے پاس صرف فوٹو کاپی ہے، جج صاحب نے ایف آئی اے ڈائریکٹر کو شوکاز جاری کیا۔

مسلم لیگ ن کی ترجمان مریم اورنگزیب کا مزید کہنا تھا کہ کسی کمیشن کی رپورٹ نہیں آتی اپنے تمام کیسز بنی گالہ میں دفن کردو،عمران خان خود چوری میں ملوث ہو تو مانٹرینگ کیسے ہو گی، بجلی گیس آٹے چینی والا مافیا عمران خان کی سربراہی میں لوٹ مار کر رہا ہے ،مانٹرینگ صرف نواز شریف اور شہباز شریف کی ہوگی۔