مخدوم شاہ محمود قریشی کا کہنا ہے کہ وزیراعظم عمران خان کی قیادت میں پاکستان، جغرافیائی سیاست سے جیواکنامکس کی طرف توجہ مرکوز کیے ہوئے ہے۔

وزارتِ خارجہ میں وزیرخارجہ مخدوم شاہ محمود قریشی کی زیرصدارت اقتصادی سفارت کاری کے حوالے سے اعلیٰ سطحی اجلاس منعقد ہوا۔ اجلاس میں اسپیشل سیکریٹری خارجہ رضا بشیرتارڑ، مختلف ممالک میں تعینات پاکستانی سفرا سمیت وزارتِ خارجہ کے سینئرافسران نے شرکت کی۔

اجلاس سے خطاب میں زیرخارجہ شاہ محمود قریشی نے کہا کہ میں آپ سب کو اقتصادی سفارت کاری پرآج کے منعقدہ اجلاس میں خوش آمدید کہتا ہوں۔ ہماری آج کی ملاقات اقتصادی سفارت کاری کو مضبوط بنانے کے لیے جاری ہماری کوششوں کا حصہ ہے۔

شاہ محمود قریشی نے کہا کہ میں مختلف خطوں میں تعینات اپنے سفیروں سے بات چیت کرتا رہا ہوں۔ مجھے یہ جان کر خوشی ہوئی کہ اقتصادی سفارت کاری پر توجہ بڑھ رہی ہے۔ مشن کے سربراہان اب ذاتی طورپراس حوالے سے دلچسپی کا مظاہرہ کررہے ہیں۔

انھوں نے کہا کہ میں سمجھتا ہوں کہ اکیلے اقتصادی سفارت کاری تبدیلی کے راستے پرگامزن ہونے کے لیے جادو کی چھڑی نہیں ہوسکتی۔ اس کے لیے ہمیں تمام کاوشیں بروئے کارلانا ہوں گی۔ بہ طورسفیرآپ کا کردارانتہائی اہمیت کا حامل ہے۔ یہ ایک بہت بڑی ذمہ داری ہے۔

وزیرخارجہ نے کہا کہ وزارتِ خارجہ کی جانب سے اقتصادی سفارت کاری پردو سفرا کانفرنسز منعقد کی گئیں۔ جس کے بعد 2020 میں نیروبی میں پاک، افریقا تجارتی ترقی کانفرنس کا انعقاد کیا گیا۔

شاہ محمود قریشی نے کہا کہ افریقا ہمارے لیے ایک اہم خطہ ہے جس کی اقتصادی صلاحیت کو بروئےکارلانے کے لیے حکومت پاکستان نے افریقا میں پانچ مشنزکھول کر اپنی سفارتی موجودگی کو بڑھایا ہے۔

مخدوم شاہ محمود قریشی نے اجلاس میں بتایا کہ پاکستان کی “کاروبار کرنے میں آسانی” کی درجہ بندی میں گزشتہ دو برسوں کے دوران 39 پوائنٹس کی بہتری آئی ہے۔ ہماری اسٹاک ایکسچینج کو ایشیا کی بہترین کارکردگی کا مظاہرہ کرنے والی مارکیٹ قرار دیا گیا ہے۔

وزیرخارجہ نے کہا کہ ہمارے کاروباری اعتماد کی درجہ بندی میں 59 پوائنٹس کا اضافہ ہوا ہے۔ افریقی ممالک کے ساتھ 7 فیصد کے حوصلہ افزا اضافے کے ساتھ پاکستان کی مجموعی تجارت بڑھی ہے۔ روشن ڈیجیٹل اکاؤنٹ (RDA) اقدام کے تحت 175 ممالک سے 299000 سے زیادہ اکاؤنٹس میں 2.9 بلین امریکی ڈالر سے زیادہ رقوم جمع ہوئی ہیں۔

انھوں نے بتایا کہ نیا پاکستان سرٹیفکیٹس میں تقریباً 2 بلین امریکی ڈالرزکی سرمایہ کاری کی گئی ہے۔ وقت آگیا ہے کہ ہم اپنے مقررکردہ اہداف کو حاصل کرنے کیلئے اپنی تمام ترتوانائیاں صرف کریں۔ اقتصادی سفارت کاری، محض درآمدات اوربرآمدات  سے کہیں زیادہ وسیع تصورہے۔

وزیرخارجہ نے مذید کہا کہ اس میں وہ تمام اقدامات شامل ہیں جو ملک کی معیشت میں بہتری لانے میں معاون ہو سکتے ہیں۔ ان کاوشوں میں تجارت، سرمایہ کاری اور سیاحت کو فروغ دینا، بیرون ملک روزگار پیدا کرنا، ترسیلات زرمیں اضافہ اور ٹیکنالوجی کی منتقلی میں سہولت فراہم کرنا شامل ہیں۔

شاہ محمود قریشی نے کہا کہ پاکستان کی برآمدات کو بڑھانے کیلئے نئےاقدامات کو بروئے کار لانے کی ضرورت ہے۔ ہمیں مستقبل کی صنعتوں پر توجہ دینے کی ضرورت ہے۔ ہمیں دیکھنا ہوگا کہ ہمارے مشنزکس طرح پاکستان کو مصنوعی ذہانت، الیکٹرک وہیکلز ٹرانسپورٹیشن اورانفارمیشن ٹیکنالوجی سے متعلق متحرک کردارادا کرسکتے ہیں۔

اُن کا کہنا تھا کہ ہمیں مذہبی سیاحت سمیت سیاحت کی تمام جہتوں کو فعال انداز میں فروغ دینے کی ضرورت ہے۔ ہمیں اپنی اقتصادی سفارت کاری پر جارحانہ انداز میں کام جاری رکھنے کی ضرورت ہے۔

مختلف ممالک میں تعینات پاکستانی سفرا نے اقتصادی سفارت کاری کے حوالے سے اب تک کی جانے والی کاوشوں سے وزیرخارجہ کو آگاہ کیا۔

اجلاس میں نیویارک میں پاکستان کے مستقل مندوب ایمبیسڈرمنیراکرم ،امریکا میں پاکستان کے سفیر ایمبیسڈر اسدمجید، ترکی میں پاکستان کے سفیرایمبیسڈرسائرس سجاد قاضی، آسٹریا میں پاکستانی سفیر آفتاب احمد کھوکھر، ایران میں تعینات پاکستانی سفیررحیم حیات قریشی، روس میں پاکستان کے سفیر شفقت علی خان، نیدرلینڈ میں تعینات پاکستانی سفیر سلجوک مستنصرتارڑ، جنیوا میں پاکستان کے مستقل مندوب خلیل ہاشمی شریک ہوئے۔