انگلش پریمئیر لیگ میں مانچسٹر یونائیٹڈ اور برینٹ فورڈ کے مابین آج ہونے والا میچ کورونا کے باعث ملتوی کر دیا گیا۔

انگلش پریمئیر لیگ کی انتظامیہ کے مطابق دونوں ٹیموں کے مابین یہ میچ اولڈ ٹریفورڈ میں  کھیلا جانا تھا ، مگر طبی ماہرین کی جانب سے کورونا کے غیر معمولی حالات قرار دیئے جانے پر میچ کو ہنگامی بنیادوں پر ملتوی کر دیا گیا۔

مانچسٹر یونائیٹڈ نے اس سے قبل ٹریننگ گراؤنڈ پر کورونا کے خطرے کو کم کرنے کے لئے اپنا ٹریننگ سیشن بھی بند کر دیا ہے۔

عالمی نشریاتی ادارے کے مطابق گزشتہ ہفتے کے دوران انگلش پریمئیر لیگ کے مختلف کلبز کے کھلاڑیوں اور اسٹاف سمیت 42 افراد میں کورونا ٹیسٹ کی رپورٹ مثبت آئی ہے ، جو کافی خطرناک صورتحال ہے۔

برائٹن ، ٹاٹینہم ، لیسٹر، آسٹن ولا اور ناروچ فٹ بال کلبزکے ترجمان  نے اپنے کھلاڑیوں اور اسٹاف ممبران میں کورونا ٹیسٹ مثبت آنے کی تصدیق کر دی ہے ، جبکہ اتوار کو برائٹن اور ٹاٹینہم کے درمیان میچ بھی اسی وبائی مرض کے باعث ملتوی کیا گیا تھا۔

مانچسٹر یونائیٹڈ فٹ بال کلب کے ترجمان کے مطابق ہفتے کے روز ناروچ کے خلاف میچ میں 0-1 سے کامیابی سے قبل کھلاڑیوں اور اسٹاف کے پی سی آر ٹیسٹ منفی تھے ، مگر برینٹ فورڈ فٹ بال کلب سے میچ سے قبل پریکٹس سیشن میں چند کھلاڑیوں کی رپورٹ مثبت آئی ہے، جو تشویشناک ہے۔

مانچسٹر فٹ بال کلب کی انتظامیہ کے مطابق کھلاڑیوں اور اسٹاف کی صحت ہماری اولین ترجیح ہے۔ کلب نے لیگ انتظامیہ سے میچ ری شیڈول کرنے کی درخواست بھی دی ہے۔