سرگودھا میں خدام خلق کے زیرِ اہتمام سانحہ آرمی پبلک اسکول کے شہداء کی یاد میں شمعیں روشن کی گئی ہیں۔

تفصیلات کے مطابق نوری گیٹ کے قریب شمعیں روشن کی گئیں، شہریوں کی بڑی تعداد شریک ہوئے، بچے، بوڑھے، جوان اور خواتین نے شہداء کی یاد میں شمعیں روشن کیں۔

اس موقع پر شرکاء کا کہنا تھا کہ ہم اپنے معصوم شہداء کو کبھی نہیں بھولیں گے،  انہوں نے ہمیں عزم و حوصلہ دیا، دہشت گردوں کے عزائم کبھی کامیاب نہیں ہوں گے۔

شرکاء نے مزید کہا کہ سانحہ آرمی پبلک اسکول کے شہداء ہمارے ماتھے کا جھومر ہیں،آج کے دن ہم عہد کرتے ہیں کہ ہم ملک دشمنوں کے آگے کبھی نہیں جھکیں گے۔

واضح رہے کہ سانحہ اے پی ایس پشاور کو سات سال بیت گئے مگر اپنے خون سے علم کے دیے جلانے والے دلوں میں وہ سارے معصوم شہید آج بھی زندہ ہیں۔

سانحہ اے پی ایس کا دلخراش واقعہ 16 دسمبر 2014 کو پیش آیا جب صبح طلباء علم کے حصول کے لیے گھر سے اسکول گئے تھے، وہ ابھی اسکول میں علم کی شمع سے روشناس ہو رہے تھے کہ 10 بجے کے درمیان 7 دہشت گرد اسکول کے اندر داخل ہوئے اور معصوم طلباء سمیت پرنسپل اور دیگر افراد کو بے رحمی سے شہید کیا۔

یہ وہ دن تھا جس کا سورج حسین تمناؤں اور دلفریب ارمانوں کے سنگ طلوع ہوا مگر غروب 132 معصوم و بے قصور بچوں کے لہو کے ساتھ ہوا تاہم یہ وہ سانحہ تھا جس نے ہر محب وطن پاکستانی کو دلگیر و اشکبار کیا۔

معصوم بچوں پر حملہ کرنے والے دہشت گردوں کو افواج پاکستان نے اسی وقت آپریشن کر کے جہنم واصل کردیا جبکہ سہولت کار بعد میں پھانسی پر چڑھ گئے لیکن 16 دسمبر کا وہ دن ملک کی تاریخ کا بھیانک خواب بن کر رہ گیا۔

16 دسمبر 2014 کو اے پی ایس پشاور لہو لہو ہوا تو ملت پاکستان نے بھی رب ذوالجلال کو گواہ بنا کر یہ عہد کر لیا کہ جب تک عرض پاک سے آخری دہشت گرد کا خاتمہ نہ ہو جائے حق و باطل اور بقا و فنا کی یہ جنگ جاری رہے گی۔

اس المناک سانحے کی آج ساتویں برسی کے موقع پر پشاور میں تقریبات کا انعقاد کیا جا رہا ہے، شہداء کے لیے ریسکیو 1122 ہیڈ کوارٹر میں فاتحہ خوانی کی گئی۔

ملک بھر میں اے پی ایس کے شہداء کی درجہ بلندی کے لئے فاتحہ خوانی اور قرآن خوانی بھی کی جا رہی ہے، اس کے ساتھ ساتھ  شہداء کی قبروں پر پھولوں کی چادریں بھی چڑھائی جا رہی گی۔