پشاور ، کوہاٹ اور بنوں کے میئر انتخاب میں جے یو آئی کے امیدوار کامیاب ہوگئے اور پی ٹی آئی کو اپ سیٹ شکست کا سامنا کرنا پڑا۔ 

 خیبر پختونخواہ کے 17 اضلاع میں بلدیاتی الیکشن کے غیر سرکاری نتائج کا سلسلہ جاری ہے۔ بلدیاتی انتخابات میں 1 کروڑ 26 لاکھ 68 ہزار 862 ووٹرز نے اپنا حق رائے دہی استعمال کیا، پی ٹی آئی کو کئی مقامات پر اپ سیٹ شکست ہوئی جبکہ جمعیت علمائے اسلام (جے یو آئی ف) کئی محاذوں پر برتری کے ساتھ فاتح قرار پائی۔

خیبرپختونخوا میں بلدیاتی الیکشن کے پہلے مرحلے کے 64 میں سے 51 نشستوں کے نتائج آگئے ہیں۔

جمعیت علماء اسلام (ف) 17، تحریک انصاف 14، اے این پی 7، آزاد امیدوار 6 نشستوں پر کامیاب جبکہ مسلم لیگ ن 3، جماعت اسلامی 2، پاکستان پیپلزپارٹی 1  اور تحریک اصلاحات پاکستان نے ایک سیٹ جیت لی۔

میئرز کے انتخابات

میئر کے انتخاب کے لیے پاکستان تحریک انصاف کا کوئی بھی امیدوار پشاور، مردان، بنوں اور کوہاٹ سے کامیاب نہ ہوسکا۔

کے پی بلدیاتی الیکشن میں 5 سٹی میئرز کے لیے انتخابات کا اعلان کیا گیا تھا لیکن سٹی کونسل ڈیرہ اسماعیل خان میں عوامی نیشنل پارٹی کے میئر کے امیدوار کے قتل کے باعث وہاں پولنگ ملتوی کردی گئی تھی جس کے بعد مردان، پشاور، کوہاٹ اور بنوں میں سٹی میئر کیلئے پولنگ ہوئی۔

پشاور میئر انتخاب

پشاور میں سٹی میئر کا میدان جے یو آئی (ف) نے مارلیا۔ جمعیت علمائے اسلام کے زبیر علی نے پی ٹی آئی امیدوار کو تقریباً 12 ہزار کے ووٹوں سے شکست دی۔ جے یو آئی کے زبیر علی نے 62 ہزار 388  ووٹ حاصل کیے جب کہ پی ٹی آئی کے امیدوار رضوان بنگش 50 ہزار 659 ووٹ لے کر دوسرے نمبر پر رہے۔

بنوں میئر انتخاب

بنوں میئر انتخابات میں بھی پی ٹی آئی کو شکست کا سامنا کرنا پڑا۔ یہاں پر جے یو آئی کے امیدوار عرفان اللہ درانی 59 ہزار 844 ووٹ لے کر کامیاب ہوئے اور پی ٹی آئی کے اقبال جدون خان 47 ہزار 398 ووٹ لے کر دوسرے نمبر پر رہے۔

کوہاٹ میئر انتخاب

کوہاٹ میں جمعیت علمائے اسلام کے امیدوار شیر زمان 34 ہزار 434 ووٹ لے کر میئر کا انتخاب اپنے نام کرچکے ہیں اور  آزاد امیدوار سیف اللہ جان 25 ہزار 793 ووٹ لے کر دوسرے نمبر پر رہے۔

مردان میئر انتخاب

مردان میں پی ٹی آئی کا مکمل صفایا ہوگیا۔ عوامی نیشنل پارٹی کے امیدوار حمایت اللہ مایار 56 ہزار 458 ووٹ لے کر کامیاب ہوگئے ہیں اور جے یو آئی کے امانت شاہ حقانی 49 ہزار 938 ووٹ لے کر دوسرے نمبر پر ہیں۔

بنوں کی تحصیلوں میں سٹی میئر کی سیٹ پر پی ٹی آئی کو سبقت حاصل ہے۔ تحصیل رستم، بونیر، کاگرہ، گدیذئی، ڈگر اور گمبٹ کی چیئرمین کی نشستیں پی ٹی آئی نے جیت لی ہیں۔

تحصیل چیرمین شبقدر کی نشست پر جے یو آئی کے حمزہ آصف 33 ہزار 244 ووٹ لے کر کامیاب ہوگئے ہیں۔

ٹانک کی دونوں تحصیلوں میں بھی جے یو آئی کے امیدوار کامیاب ہوگئے ہیں۔

تحصیل نورنگ میں جماعت اسلامی کے امیدوار حاجی عزیز اللہ 17 ہزار ووٹ لے کر الیکشن جیت گئے ہیں۔

خیبر پختونخوا، 17 اضلاع میں بلدیاتی حکومتوں کے انتخابات