پی پی پی کی مرکزی سیکریٹری اطلاعات شازیہ مری نے کہا ہے کہ پاکستان کے عوام 10 دسمبر کو مہنگے پیٹرول کے خلاف سڑکوں پر نکلیں گے۔

شازیہ مری نے عالمی منڈی میں پیٹرول کی قیمت گرنے کے باوجود ملک میں مہنگے پیٹرول کی فروخت پر تشویش کا اظہار کیا، ان کا کہنا تھا کہ جب دنیا میں پیٹرول کی قیمتیں کم ہو رہی ہیں تو وزیر اعظم عمران خان پاکستان کے عوام کو مہنگا پیٹرول کیوں فروخت کررہے ہیں؟

انہوں نے کہا کہ وزیر اعظم صاحب تیار رہیں، پیٹرولیم مصنوعات کی بڑھتی قیمتوں پر عوام 10 دسمبر کو حساب لینے سڑکوں پر آ رہے ہیں، پاکستان کے عوام 10 دسمبر کو مہنگے پیٹرول کے خلاف سڑکوں پر نکلیں گے اور دمادم مست قلندر ہوگا۔

شازیہ مری کا کہنا تھا کہ پاکستان پیپلز پارٹی کی کال پر 10 دسمبر کو پیٹرولیم مصنوعات کی بڑھتی قیمتوں پر احتجاج عمران خان کے لیے نوشتہ دیوار ثابت ہوگا، آج بھارت نے بھی حکومتی ٹیکسوں میں کمی لا کر پیٹرول مزید سستا کیا ہے مگر پی ٹی آئی حکومت کو پاکستانی عوام کی کوئی فکر نہیں ہے۔

انہوں نے کہا کہ یہ ظلم کی انتہا ہے کہ عمران خان ایک لیٹر پر 27 روپے تک پیٹرولیم لیوی کی مد میں عوام سے وصول کر رہا ہے، حکومت فی الفور پیٹرولیم مصنوعات کو نہ صرف کم ہوتی عالمی قیمتوں کے برابر کرے بلکہ حکومتی ٹیکس میں بھی کمی لائے۔

شازیہ مری کا کہنا تھا کہ یہ فراڈ ہے کہ کم ترین فی کس آمدنی والے ملک پاکستان کا پیٹرولیم مصنوعات کی قیمتوں میں خوش حال ترین ممالک سے موازنہ کیا جائے، آج پاکستان میں مہنگائی بلند ترین سطحی پر پہنچ چکی ہے اور سلیکٹڈ حکمران بے بسی کا مظاہرہ کر رہے ہیں۔

 پی پی پی کی مرکزی سیکریٹری اطلاعات شازیہ مری نے مزید کہا کہ کھانے پینے کی اشیاء لوگوں کی پہنچ سے باہر ہے اور لوگ قرضوں میں ڈوب چکے ہیں، پی ٹی آئی حکومت کو لوگوں کا خوف نہیں مگر خدا کا تو خوف کرے اور لوگوں پر رحم کرے۔