پرویز الٰہی نے کہا ہے کہ سیالکوٹ واقعہ سے انسانیت کا سر شرم سے جھک گیا ہے۔
اسپیکر پنجاب اسمبلی چوہدری پرویز الٰہی سے سری لنکا کے اعزازی قونصل جنرل یاسین جوئیہ کی گورنر ہاؤس میں ملاقات ہوئی۔
انہوں نے کہا کہ اسلام امن اور سلامتی کا مذہب ہے، سیالکوٹ واقعہ سے انسانیت کا سر شرم سے جھک گیا ہے۔
چوہدری پرویزالٰہی کا کہنا تھا کہ سری لنکن حکومت، عوام اور سوگوار خاندان سے دلی تعزیت کرتے ہیں، پنجاب حکومت مقتول کے خاندان کیلئے مالی امداد کا فوراً اعلان کرے۔
اسپیکر پنجاب اسمبلی چوہدری پرویز الٰہی کا مزید کہنا تھا کہ یاسین جوئیہ کے سری لنکن شہری کی میت کو 48 گھنٹے کے اندر انتظامات کرنے کے اقدام کو سراہتے ہیں، اس مشکل صورتحال میں یاسین جوئیہ نے جس جذبے سے کام کیا وہ قابل ستائش ہے۔
ملاقات میں سری لنکا کے اعزازی قونصل یاسین جوئیہ نے سری لنکن حکومت اور ہائی کمیشن کی جانب سے مقتول کی میت بروقت اور اعزاز کے ساتھ بھیجنے پر پنجاب حکومت کا شکریہ ادا کیا۔
یاد رہے کہ حال ہی میں سیالکوٹ میں نجی فیکٹری کا سری لنکن منیجر فیکٹری ملازمین کے تشدد سے ہلاک ہوگیا تھا۔
مشتعل افراد نے لاش کو سڑک پر گھسیٹا اور آگ لگادی تھی اور دعویٰ کیا کہ مقتول نے مبینہ طور پر مذہبی جذبات مجروح کیے تھے، مشتعل افراد نے فیکٹری میں توڑ پھوڑ بھی کی۔
سانحہ سیالکوٹ کی پولیس تحقیقات جاری ہیں، دوران تحقیقات اب تک 110 افراد کی شناخت ہوگئی ہے، جن میں 13 مرکزی ملزمان ہیں، ملزمان طلحہ اور فرحان نے پولیس کے سامنے اپنے جرم کا اعتراف کرلیا ہے۔
پولیس رپورٹ کے مطابق مرکزی ملزم فرحان ادریس گرفتار ہے جبکہ گرفتار ملزم جنید جلتی لاش کے ساتھ سیلفی لیتے دیکھا گیا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News