پاکستان مسلم لیگ (ن) کے صدر شہباز شریف نے کہا کہ پاکستان کی سلامتی کیلئے جانوں کا نذرانے دینے والوں کو سلام پیش کرتے ہیں۔

قائد حزب اختلاف شہباز شریف نے کیچ میں چیک پوسٹ پر حملے کی مذمت کرتے ہوئے کہا کہ بلوچستان، کیچ میں چیک پوسٹ میں حملے میں شہید ہونے والوں کے اہل خانہ سے تعزیت اورہمدردی کا اظہار کرتے ہیں۔

انہوں نے کہا کہ خوشاب سے لانس نائیک منظر عباس اور خضدار سے سپاہی عبدالفاتح کی شہادت پر انہیں خراج عقیدت پیش کرتے ہیں

شہباز شریف نے کہا کہ پاکستان کی سلامتی اور دفاع کے لئے جانوں کے نذرانے دینے والے قوم کے بیٹوں کو سلام پیش کرتے ہیں۔

انہوں نے مزید کہا کہ اللہ تعالیٰ شہداء کے درجات بلند فرمائے اور اہل خانہ کو صبر جمیل دے۔

 اس سے قبل وزیر داخلہ شیخ رشید احمد نے بھی بلوچستان کے علاقے کیچ میں دہشت گردوں کے سیکیورٹی فورسز کی چیک پوسٹ پر حملے کی شدید مذمت کی تھی۔

شیخ رشید احمد نے کہاکہ سیکیورٹی فورسز دہشت گرد عناصر کے مکمل خاتمے کے لئے تمام وسائل بروئے کارلارہی ہیں۔

انہوں نے حملے میں شہید ہونے والے لانس نائیک منظر عباس اور سپاہی عبدالفاتح کی شہادت پردکھ کا اظہار کیا اور دعا مغفرت بھی کی۔

واضح رہے کہ بلوچستان کے ضلع کیچ میں دہشت گردوں نے سیکیورٹی فورسز کی چیک پوسٹ پرحملہ کیا۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ  بیان کے مطابق فائرنگ کے تبادلے میں ضلع خوشاب کے رہائشی لانس نائیک منظر عباس اور خضدار کے رہائشی سپاہی عبدالفتاح  شہید ہوگئے۔

یہ بھی پڑھیں: بلوچستان، دہشت گردوں کا سیکیورٹی فورسز کی چیک پوسٹ پرحملہ

آئی ایس پی آر کے مطابق سیکیورٹی فورسز کا علاقے میں سرچ آپریشن جاری ہے۔

ڈی جی آئی ایس پی آر کا کہنا ہےکہ  سیکیورٹی فورسز ایسے دشمن عناصر کی کارروائیوں کو شکست دینے کے لیے پرعزم ہیں، جن کا مقصد بلوچستان کے امن، استحکام اور ترقی کو متاثر کرنا ہے۔