لاپتہ افراد سے متعلق قائم قومی کمیشن کی ماہانہ پیش رفت رپورٹ جاری کردی گئی۔

رپورٹ میں بتایا گیا کہ لاپتہ افراد کمیشن نے اب تک مجموعی طور پر 6 ہزار 47 کیسز نمٹا دیئے ہیں۔

رپورٹ میں کہا گیا کہ لاپتہ افراد کمیشن نے نومبر 2021 میں 123 کیسز نمٹائے ہیں۔

رپورٹ  کے مطابق کمیشن کو سینیٹر جہانزیب جمالدینی سے بلوچستان کے لاپتہ افراد کی فہرست بھی ملی، تاہم فہرست میں لاپتہ افراد سے متعلق معلومات مکمل نہیں تھیں۔ کمیشن نے اپنے طور پر آواران، کیچ اور پنجگور کے ڈی سیز سے معلومات لیں۔

رپورٹ میں بتایا گیا کہ 748 لاپتہ افراد اب تک گھروں کو واپس آچُکے ہیں، دیگر افراد کا سراغ لگانے کیلئے کوئٹہ میں کمیشن ممبر کی موجودگی ضروری ہے۔

قبل ازیں، اسلام آباد ہائی کورٹ میں لاپتہ صحافی کیس کی سماعت کے دوران چیس جسٹس لاہور ہائیکورٹ جسٹس اطہر من اللہ نے ریمارکس دئیے تھے کہ لاپتہ افراد کی ذمہ داری وزیراعظم اور کابینہ پر آتی ہے۔

جسٹس اطہر من اللہ نے خیال کا اظہار کیا کہ کیوں نہ لاپتہ افراد کے معاوضے کی رقم ریاست کی بجائے وزیراعظم اور کابینہ ارکان ادا کریں؟

چیف جسٹس لاہور ہائیکورٹ نے کہا کہ کیوں نہ ایک قانون بنایا جائے کہ جو ذمہ دار ہے اس سے معاوضہ لیا جائے، اگر کوئی 2002 میں لاپتہ ہوا تو کیوں نہ اس وقت کے ذمہ داروں کو جرمانے کیے جائیں، اس وقت کے چیف ایگزیکٹو کو ذمہ دار ٹھہرا کر اسے ازالے کی رقم ادا کرنے کا کیوں نہ کہا جائے؟