معروف ٹیکنالوجی کمپنی سام سنگ نے اپنا سستا ترین 5 جی فون ’گلیکسی اے 13‘ متعارف کروادیا۔

جنوبی کورین ٹیکنالوجی کمپنی سام سنگ کی جانب سے چند ماہ قبل ’گلیکسی اے 13‘ کا تذکرہ کیا تھا جس کے بعد سے ہی صارفین کو اس موبائل فون کا شدت سے انتظار تھا اور اب کمپنی نے اسے فروخت کے لیے پیش کردیا ہے۔

سام سنگ کے ’گلیکسی اے 13‘ کو سب سے پہلے امریکا میں فروخت کے لیے پیش کیا گیا ہے جب کہ یہ موبائل فون 3 دسمبر یعنی کل سے آن لائن بھی دستیاب ہوگا ۔ صارفین امریکا کی ٹیلی کمیونیکشن کمپنی ’اے ٹی اینڈ ٹی‘ کے ذریعے یہ موبائل فون آن لائن آرڈر کرسکتے ہیں۔

سام سنگ کی جانب سے گلیکسی اے 13 میں آج تک کی سب سے ’سستی ترین 5 جی‘ چپ انسٹال کی گئی ہے اور اس کی قیمت 249.99 ڈالر رکھی گئی ہے اور یہ رقم پاکستانی روپے میں تقریباً 43 ہزار بنتی ہے۔

دوسری جانب سام سنگ کی جانب سے صارفین کی آسانی کے لیے یہ موبائل فون 3 سال کی آسان قسطوں پر بھی فراہم کیا جائے گا جس کے لیے ہر ماہ 6.95 ڈالر (1230 روپے) دینا ہوں گے۔

گلیکسی اے 13 کے فیچرز کی بات کریں تو اس کا ڈسپلے 6.5 انچ (90 ہرٹز ریفریش ریٹ) کے ساتھ رکھا گیا ہے اور اس کا پاور پراسیسر 700 میڈیا ٹیک ڈائیمنسی کا ہے۔

موبائل فون کی اسٹوریج 64 جی بی کی ہے اور بیٹری 5000 ایم اے ایچ بیٹری 15 واٹ چارجنگ سپورٹ کے ساتھ دی گئی ہے تاہم موبائل کے ریم کے حوالے سے کچھ نہیں کہا گیا ہے۔

گلیکسی اے 13 کے فرنٹ پر 5 میگا پکسل کا کیمرا موجود ہے جب کہ بیک سائیڈ پر 3 کیمروں کا سیٹ دیا گیا ہے جس میں مین کیمرا 50 میگا پکسل ، 2 میگا پکسل ڈیپتھ سینسر اور 2 میگا پکسل میکرو لینس کے ساتھ موجود ہے (یہ سینسر کسی بھی تصویر کو فوکس کرنے میں مدد فراہم کرتے ہیں)۔

خیال رہے چند روز قبل سام سنگ نے اپنے انٹری لیول گلیکسی اے سیریز میں بھی اضافہ کیا تھا، کمپنی نے گلیکسی اے زیرو تھری اور گلیکسی اے زیرو تھری کور متعارف کروائے تھے تاہم ان موبائل کے مارکیٹ میں دستیابی کے حوالے سے کوئی تاریخ سامنے نہیں آئی۔