وزیراعلی سندھ مراد علی شاہ نے اسکاؤٹس کیمپنگ میں حصہ لینے کا اعلان کیا ہے۔

انہوں نے 8ویں اسکاؤٹ کیم پوری کی اختتامی تقریب سے خطاب کرتے ہوئے کہا کہ مجھے اس تقریب میں شرکت کرنے پر بڑی خوشی محسوس ہورہی ہے۔

مراد علی شاہ نے کہا کہ یہاں مجھے آکر اپنا ماضی یاد آگیا، میں اسکاؤٹنگ کی تربیت کے لیے یہاں آیا کرتا تھا، آج میں جس منصب پر فائز ہوں اس میں اسکاؤٹ کا بڑا اہم کردار ہے۔

انکا کہنا ہے کہ ہمیں نوجوانوں کو اسکاؤٹس کی طرف متوجہ کرنے کی ضرورت ہے، اس کی بامقصد تربیت سے مثبت نتائج دیکھنے کو ملتے ہیں۔

وزیراعلی سندھ نے کہا کہ مجھے بڑی خوشی ہے کہ میرے صوبے میں اسکاؤٹ ایسوسی ایشن سید ممتاز علی کی قیادت اور محمد صدیق  کی سرپرستی میں کام کررہی ہے، کورونا جیسے وبا کے دوران بھی  اسکاؤٹس ایسوسی ایشن  نے اپنا رول بھرپور انداز میں ادا کیا۔

انہوں نے کہا کہ اجتماعیت ہی وہ قوت ہے جس کے ذریعے بڑے بڑے کام سرانجام دیئے جاسکتے ہیں، سندھ میں اسکاؤٹنگ کے حوالے سے اس کیمپوری کا انعقاد قابل قدر ہے۔

وزیراعلی سندھ نے بھی اسکاؤٹس کیمپنگ میں حصہ لینے کا اعلان کیا اور کہا کہ مارچ میں اسکاؤٹس ہیڈکوارٹر میں اسکاؤٹس پروگرام ہوگا۔

مرادعلی شاہ نے مزید کہا کہ میں خود مارچ میں منعقدہ اسکاؤٹس کیمپ میں شریک ہوںگا اور رات گزاروں گا۔