سابق وزیرِ داخلہ سینیٹر رحمان ملک نے کہا ہے کہ کالعدم ٹی ٹی پی نے مذاکرات کے بعد دوبارہ حملے شروع کردیئے ہیں۔

پیپلز پارٹی کے رہنما رحمان ملک نے میڈیا سے گفتگو کرتے ہوئے کہا کہ آصف علی زرداری سیاسی طور پر ایکٹیو ہوئے اور انکے ایکٹیو ہونے پر مخالفین کے پیٹ میں درد ہو رہا ہے۔

انہوں نے کہا کہ پیپلز پارٹی مضبوط طور پر ابھر کر سامنے آرہی ہے، بے نظیر بھٹو پر لیاقت باغ سے پہلے بھی حملے ہوئے، ان کے قتل کے تانے بانے بیرون ملک بھی جاتے ہیں۔

سابق وزیرِ داخلہ کا کہنا ہے کہ حکومت کی نااہلی بھی محترمہ کے قتل میں شامل تھی، محترمہ بے نظیر بھٹو کو سیکیورٹی کیوں نہیں دی گئی؟

سینیٹر رحمان ملک نے مزید کہا ہے کہ مجرموں کو سزا ہونی چاہیے، ٹی ٹی پی نے مذاکرات کے بعد دوبارہ حملے شروع کردیئے ہیں۔

انکا کہنا ہے کہ مجھے افسوس صرف افغان طالبان سے ہے کہ ہم نے تو آپ کو اپنی زندگی دے دی، آپ کے مہاجرین سے لیکر ہر قسمکی مدد کی، آج جب پاکستان کے خلاف ہمارے دشمن سرگرم ہورہے ہیں، تو آپ ان کا ساتھ دے رہے ہیں۔

 سابق وزیرِ داخلہ نے کہا کہ آپ چاہتے ہیں ٹی ٹی پی اور پاکستان دونوں طرف بیٹھیں، ٹی ٹی پی ایک دہشتگرد جماعت ہے اور ڈیکلیئرڈ دہشتگرد جماعت ہے۔

 انہوں نے مزید کہا کہ 4 دن سے وہ پاکستان کی افواج پر حملے کررہے ہیں ، ہم کیسے برداشت کرسکتے ہیں؟ میری اپیل ہے حقانی اور افغانستان کے وزیر داخلہ سے کہ وہ اکرام اللہ کو پکڑ کر ہمارے حوالے کرے کیونکہ وہ ہمیں چاہیے۔