حالیہ تحقیق میں ماہرین نے انکشاف کیا ہے کہ انسانی جسم میں وٹامن اے چربی کو پگھلانے کا کام کرتا ہے۔

ویانا میڈیکل یونیورسٹی کے ماہرین کی تحقیق میں یہ بات سامنے آئی ہے کہ سرد موسم میں انسانی جسم وٹامن اے کی زیادہ ضرورت محسوس کرتا ہےکیونکہ جسم میں چربی کا بےحد اضافہ ہو چکا ہوتا ہے اور میٹابولک سرگرمیوں اور توانائی کی کھپت میں اضافہ ہوجاتا ہے۔

ماہرین نے بتایا کہ انسانی جسم میں کافی مقدار میں سفید چربی موجود ہوتی ہے جو کولہوں کے اطراف  اور پیٹ میں جمع ہوتی ہے۔

ماہرین کا کہناہے کہ وٹامن اے ایڈیپوز ٹشوز کے کام میں اہم کردار ادا کرتا ہے اور توانائی کے استعمال کو مضبوط کرتا ہے۔

تاہم ماہرین نے خبردار کیا ہے کہ لوگ وٹامن اے کے حصول کے لیے ڈاکٹر کی ہدایت کے بغیر کوئی دوا استعمال نہ کریں۔

ماہرین تاحال اس بات کی تحقیق میں مصروف ہیں کہ موٹاپے سے بچاؤ کے لیے چربی کے خلاف مزید کیا اقدامات کیے جاسکتے ہیں۔

وٹامن اے کا شُمار اُن وٹامنز میں ہوتا ہے جو پانی میں حل نہیں ہوتے اور چکنائی کے ساتھ جسم میں جذب ہوتے ہیں اور ہمارے جسم کے فنکشنز کو فعال رکھنے میں انتہائی اہم کردار ادا کرتے ہیں خاص طور پر بینائی قوت مدافعت اور جلد کی صحت میں وٹامن اے انتہائی اہم کردار ادا کرتا ہے۔

ترقی یافتہ ممالک میں عام طور پر لوگ وٹامن اے کی کمی کا شکار نہیں ہوتے اور اس وٹامن کی کمی کا شکار ترقی پزیر ممالک بشمول پاکستان کے لوگ بڑی تعداد میں ہیں خاص طور پر حاملہ خواتین اور وہ خواتین جو بچوں کو دُودھ پلاتی ہیں چھوٹے اور بڑے بچے اس وٹامن کی شدید کمی کا شکار ہیں۔