سانحہ سیالکوٹ: عدالت نے مزید 33 ملزمان کا جسمانی ریمانڈ منظور کر لیا۔

سانحہ سیالکوٹ میں سری لنکن شہری پریانتھاکمارا کی ہلاکت میں ملوث مزید 33 ملزمان کو انسداد دہشتگردی عدالت میں پیش کیا گیا، عدالت نے کیس کی سماعت کرتے ہوئے ملزمان کو 17 روزہ جسمانی ریمانڈ پر پولیس کے حوالے کردیا۔

پنجاب پولیس کی جانب سے سی سی ٹی وی فوٹیج اورموبائل کالز کے ڈیٹا کی مدد سے ان ملزمان کو گرفتار کیا گیاتھا۔

ترجمان پنجاب پولیس کے مطابق ان ملزمان میں سری لنکن شہری پریانتھا کمارا کی نعش کی بے حرمتی کرنے والا ذاکر سلمان بھی شامل ہے، گرفتار ملزمان میں واقعے کی ویڈیو بنانے، اشتعال دلانے اور تشدد کرنے والے بھی شامل ہیں۔

متعلقہ خبر: سری لنکن شہری کو بچانے کی کوشش کرنیوالے ملک عدنان کو گواہ بنانے کا فیصلہ

پیشی کے موقع پر پولیس کی طرف سے سیکیورٹی کے انتہائی سخت انتظامات کیے گئے تھے۔

‘سانحہ سیالکوٹ’

رواں ماہ 3 دسمبر کو اسپورٹس گارمنٹ کی فیکٹری کے غیر مسلم سری لنکن منیجر پریانتھا کمارا پر فیکٹری ورکرز نے مذہبی پوسٹر اتارنے کا الزام لگا کر حملہ کردیا تھا۔

پریانتھا کمارا جان بچانے کیلئے بالائی منزل پر بھاگے لیکن فیکٹری ورکرز نے پیچھا کیا اور چھت پر گھیر لیا۔

انسانیت سوز خونی کھیل کو فیکٹری گارڈز روکنے میں ناکام رہے، فیکٹری ورکرز منیجر کو مارتے ہوئے نیچے لائے ، مار مار کر جان سے ہی مار دیا اور اس کے بعد لاش کو گھسیٹ کر فیکٹری سے باہر چوک پر لے گئے اور نعش پر ڈنڈے اور لاتیں مار کر آگ لگا دی۔