اسلام آباد: ایوان صدر میں انتخابی اصلاحات بل 2021 پر دستخط کرنے کی تقریب منعقد کی گئی، جس میں چلائے گئے پرومو کو سازش قرار دیدیا گیا۔ تقریب کو مختلف وجوہات کی بنا پر متنازع بنا دیا گیا۔

حکومتی اور اپوزیشن ارکان کی تقریب میں عدم دلچسپی نے نئی بحث چھیڑ دی۔

تقریب دو گھنٹے تاخیر کا شکار ہوئی، دعوت نامے کے باوجود اکثریت تقریب میں شریک نہ ہوئی۔ صرف پانچ وزراء شبلی فراز، اسدعمر، علی محمد خان، شیریں مزاری، بابر اعوان اور شفقت محمود تقریب میں نظر آئے۔

وزراء سمیت کئی اہم شخصیات کو ٹیلی فون کرکے ایوان صدر بلایا گیا۔ سینیٹر ڈاکٹر ہمایوں مہمند اور رکن اسمبلی عبدالشکور شاد نے شرکت کی۔

الیکشن کمیشن آف پاکستان اور نادرا کےاعلیٰ حکام مدعو ہونے کے باوجود نہ آئے۔

وفاقی وزراء کے درمیان الیکشن کمیشن ارکان کی عدم شرکت پر چہ مگوئیاں شروع ہوگئیں۔

عبدالشکور شاد نے تقریب میں چلائے گئے پرومو کو سازش قرار دیدیا۔

ویڈیو میں پاکستان کا پرچم دکھانے کے بجائے پارٹی پرچم دکھانے پر تنقید کی گئی۔

بعد ازاں، صدرِ مملکت ڈاکٹر عارف علوی نے انتخابی اصلاحات بل 2021 پر دستخط کردیے۔

اسلام آباد میں تقریب سے خطاب کرتے ہوئے صدرِ مملکت نے کہا کہ انتخابی اصلاحات کے لیے کاوشوں پر وزیراعظم کو مبارکباد دیتا ہوں، الیکٹرانک ووٹنگ مشین سے شفاف انتخاب کے انعقاد میں سہولت ہوگی۔