پاکستانی نژاد امریکی خاتون وجیہہ سواتی کیس میں اہم پیش رفت ہوئی ہے، ملزم رضوان حبیب نے اپنی سابقہ بیوی وجیہہ سواتی کے قتل کا اعتراف کرلیا۔

ملزم سابق شوہر رضوان حبیب نے پاکستانی نژاد امریکی خاتون وجیہہ سواتی کے قتل کا اعتراف کرلیا۔

پولیس کے مطابق ملزم رضوان حبیب نے وجیہہ سواتی کو خیبر پختون خوا کے علاقے میں لاش کو چھپانے کا انکشاف کیا ہے۔

راولپنڈی پولیس کی ٹیمیں لاش کی برآمدگی کے لئے خیبر پختون خوا کیلئے روانہ ہوگئی ہیں۔

یادرے ہے راولپنڈی پولیس نے بدھ کے روز سابقہ بیوی کے اغواء کے الزام میں شوہر رضوان حبیب کو گرفتار کیا تھا۔

وجیہہ قتل کیس کا پس منظر

مورگاہ پولیس نے 2 نومبر کو مغویہ کے بیٹے عبداللہ مہدی کی مدعیت میں ان کی والدہ کے اغواء کا مقدمہ درج کیا تھا۔

بیٹے کی مدعیت میں درج ایف آئی آر میں بتایا گیا کہ والدہ اپنے بھانجے کے ساتھ 16 اکتوبر کو فلائٹ نمبر BA-0261 کے ذریعے برطانیہ سے پاکستان آئی تھیں۔ انہیں 22 اکتوبر کو فلائٹ نمبر BA-0260 سے واپس جانا تھا۔

ایف آئی آرکے مطابق ان کی والدہ اور 2 مزید بچے سب امریکی شہریت کے حامل ہیں اور والد کی وفات کے بعد سے امریکا میں ہی مقیم ہیں۔

ایف آئی آر میں کہا گیا کہ والدہ اپنے سابقہ شوہر رضوان حبیب سے جائیداد کے معاملات سلجھانے کے لئے پاکستان آئی تھیں، سابق شوہر رضوان حبیب نے انہیں جائیداد کی خاطر اغوا کیا۔

ایف آئی آر میں کہا گیا ہے کہ رضوان حبیب وجیہہ سواتی اور ان کے بھانجے کو ڈی ایچ اے راولپنڈی کے ایک گھر لے کر گئے اور انہیں بند کر دیا۔ جب بھانجے کی آنکھ کھلی تو وجیہہ سواتی اور ان کے سابق شوہر وہاں موجود نہیں تھے۔ ان کے بھانجے کو بھی ملازموں نے گھر میں لاک کر رکھا تھا لیکن وہ اپنی جان بچاتے ہوئے فرار ہونے میں کامیاب ہوگئے۔

ایف آئی آر میں مزید کہا گیا ہے کہ وجیہہ سواتی کے پاس ان کے بھانجے کا پاسپورٹ اور قومی شناختی کارڈ بھی تھا تاہم وہ ایمرجنسی سفری دستاویزات بنا کر 22 اکتوبر کو پاکستان چھوڑ کر برطانیہ لوٹنے میں کامیاب ہوگئے۔

بیٹے کی مدعیت میں درج کیے گئے مقدمے میں الزام عائد کیا گیا تھا کہ ان کی والدہ کو اغوا کرنے میں ان کے سابق شوہر ملوث ہیں جب کہ انہیں رضوان حبیب کی جانب سے قتل کی دھمکیاں بھی موصول ہوئی ہیں۔