یورپی یونین کے 15 ممالک نے 40 ہزار افغان مہاجرین کو پناہ دینے پررضامندی ظاہر کردی۔ 

غیر ملکی خبررساں ادارے کے مطابق یورپی یونین کی ہائی کمشنر برائے داخلہ یلوا جوہانسن نے ایک پریس کانفرنس کے دوران اس بات کی تصدیق کرتے ہوئے کہا کہ ہم 40 ہزار افغان مہاجرین کی آبادکاری کریں گے،  یہ فیصلہ نہایت متاثر کن اور باہمی اتحاد کی ایک مثال ہے۔

فرانسیسی خبررساں ادارے (اے ایف پی) کو دستیاب ڈاکیومنٹس کے مطابق جرمنی 25 ہزار افغان مہاجرین کو پناہ دے گا، نیدرلینڈ 3 ہزار 159 افغان مہاجرین کو قبول کریں گے اور سپین اور فرانس 2500 ، 2500 مہاجرین کو پناہ دیں گے جب کہ باقی ممالک کم تعداد میں افغان مہاجرین کو قبول کریں گے۔

اس سے قبل اقوام متحدہ کے ہائی کمشنر برائے مہاجرین نے یورپی یونین سے درخواست کی تھی کہ وہ 5 سال کے دوران 42 ہزار 500 مہاجرین کو قبول کرنے کی استدعا کی تھی تاہم 27 ممالک کی یونین میں سے متعدد ممالک نے اس پر اعتراض کیا تھا۔

مزید پڑھئے؛ پاکستان نے لاکھوں افغان مہاجرین کی میزبانی کی ہے، فواد چوہدری

رواں سال اگست میں طالبان کے دوبارہ اقتدار میں آنے کے بعد تقریباً 85 ہزار افغان اپنے ملک سے فرار ہوکر یورپی یونین اور ان کے اطراف کے ممالک میں پہنچنے میں کامیاب ہوئے تھے۔

افغانستان سے امریکی انخلا کے بعد اقوام متحدہ کے ادارہ برائے مہاجرین (یواین ایچ سی آر) نے خبردار کیا تھا کہ 85 ہزار لوگوں کی جانوں کو خطرہ ہے اور وہ مشکل صورتحال سے دوچار ہیں، انہیں دوبارہ آبادکاری کی ضرورت ہے لہذا یورپی یونین کو آدھے لوگوں کو پناہ دینی چاہیے۔

واضح رہے 20 سال کی طویل جنگ کے بعد امریکی فوج اچانک راتوں رات افغانستان سے نکل گئی تھی اور اس دوران یورپی یونین کے 24 ممالک 28 ہزار مہاجرین کو پناہ دے چکے ہیں۔