امریکی ٹیکنالوجی کمپنی مائیکرو سافٹ نے پائریٹڈ سافٹ ویئر استعمال کرنے والوں کے لیے اہم اعلان کردیا ہے۔
کمپیوٹرکے استعمال کنندگان کے لیے آپریٹنگ سسٹم ونڈوزسے سہولیات کا ایک نیا راستہ پیدا کرنے والی کمپنی مائیکرو سافٹ نے اپنی ایپلی کیشنزاوردیگرسافٹ ویئرکے پائریٹڈ ورژن استعمال کرنے والے صارفین کے لیے انوکھی پیش کش کردی ہے۔ جس کا مقصد دنیا بھرکے لاکھوں، کروڑوں صارفین کی جانب سے بلا جھجک بنا لائسنس کے ونڈوزاور مائیکرو سافٹ آفس استعمال کرنے والے افراد کو آفیشل پلیٹ فارم پرلانا ہے۔

کمپیوٹرٹیکنالوجی کی خبریں دینے والی ویب سائٹ پی سی ورلڈ کے مطابق مائیکروسافٹ نے پائریسی کے سدباب کے لیے موثراقدامات کرنے کا فیصلہ کیا ہے۔ پہلے مرحلے میں مائیکرو سافٹ جعلی، بنا لائسنس اورپائریٹڈ کاپی استعمال کرنے والے صارفین کوایم ایس آفس 365 کے آفیشل اورقانونی ورژن کی قیمت میں 50 فیصد کی رعایت دے رہا ہے۔

مائیکروسافٹ کے اس اہم اقدام کا مقصد پائریٹڈ ورژن استعمال کرنے والے صارفین کو آٖفس 365 سوٹ کی خریداری اور اس کے آن لائن استعمال کی ترغیب دینا ہے۔

دوسری جانب مائیکروسافٹ اب اس طرح کی ایپلی کیشن فراہم کرنے والی واحد کمپنی نہیں رہی اوراس کی روایتی حریف کمپنی گوگل نے ایم ایس ورڈ کی جگہ گوگل ڈوکس، ایکسیل کی جگہ شیٹس، پاور پوائنٹس کی جگہ سلائیڈ اور دیگرایم آفس ایپلی کیشنز کے متبادل پیش کردیے ہیں۔ جب کہ مفت ہونے کی وجہ سے بہت سے ادارے اورافراد مائیکروسافٹ کوچھوڑکربتدریج گوگل کی ان ایپلی کیشنزکواپنا رہے ہیں۔

 رپورٹ میں بتایا گیا ہے کہ مائیکروسافٹ نے درج بالا عوامل کومد نظررکھتے ہوئے اپنی بقا کے لیے رعایت کے ساتھ ساتھ دیگر مراعات بھی دینے کا فیصلہ کیا ہے جن کا اعلان کچھ ہی عرصے میں متوقع ہے۔