انسپکٹر جنرل (آئی جی) پولیس اسلام آباد قاضی جمیل الرحمان نے کہا ہے کہ پولیس ٹیم نے بہترین نشانہ بازی کا مظاہرہ کر کے اسلام آباد پولیس کا نام روشن کیا۔

ترجمان اسلام آباد پولیس کے مطابق اسلام آباد پولیس نے نیشنل لیول کا تیسرا سالانہ شوٹنگ مقابلہ جیت کر ٹرافی اپنے نام کر لی، آئی جی اسلام آباد قاضی جمیل الرحمان نے پہلی پوزیشن حاصل کرنے پر اسلام پولیس ٹیم کی حوصلہ افزائی کے لئے پروقار تقریب کا انعقاد کیا۔

آئی جی اسلام آباد نے پولیس ٹیم کو تعریفی سرٹیفکیٹ اور انعامات سے نوازا اور ٹیم کو آئندہ بھی اسی جذبے کے ساتھ مقابلے کی ترغیب دی۔

انسپکٹر جنرل قاضی جمیل الرحمان نے اس موقع پر کہا کہ اسلام آباد پولیس کو یہ اعزاز حاصل ہے کہ مسلسل تیسری بار ان مقابلوں میں پہلی پوزیشن حاصل کی، پولیس ٹیم نے بہترین نشانہ بازی کا مظاہرہ کر کے اسلام آباد پولیس کا نام روشن کیا۔

واضح رہے کہ پولیس لائنز ہیڈ کواٹرز میں نیشنل پولیس بیورو نے چار روزہ آل پاکستان شہداء میموریل شوٹنگ مقابلوں کا انعقاد کیا تھا، نشانہ بازی کے مقابلوں میں آئی بی، ایف سی، پنجاب، بلوچستان، خیبر پختونخوا، آزاد کشمیر، گلگت بلتستان اور ایس ایس یو سندھ پولیس ٹیموں نے حصہ لیا تھا۔

 نشانہ بازی مقابلوں میں پولیس اہلکاروں کے علاوہ خواتین پولیس نے بھی اپنی مہارت کے جوہر دکھائے، منعقد کردہ مقابلوں میں اسلام آباد پولیس پہلی، پنجاب پولیس دوسری جبکہ سندھ پولیس نے تیسری پوزیشن حاصل کی۔

یاد رہے کہ یہ ایونٹ ہر سال شہداء کو خراجِ تحسین اور پولیس اہلکاروں کی حوصلہ افزائی کے لیے منعقد کیا جاتا ہے۔