چینی ٹینس اسٹار پینگ شوائی کا کہنا ہے کہ انہوں نے کسی پر جنسی ہراسانی کا الزام نہیں لگایا، یہ ذاتی معاملہ تھا جس پر لوگوں کو کافی غلط فہمی ہوئی۔

خبر رساں ادارے کے مطابق چینی ٹینس اسٹار پینگ شوائی کا چینی اخبار کو بیان دیتے ہوئے کہنا تھا کہ انہوں نے کبھی کسی پر جنسی ہراسانی کا الزام نہیں لگایا۔

رپورٹ کے مطابق پینگ شوائی کا کہنا تھا کہ میں ایک بہت اہم نقطے کی طرف اشارہ کرنا چاہوں گی، ’میں نے نہ کبھی لکھا اور نہ کہا کہ کسی نے مجھ پر جنسی حملہ کیا ہے‘ جبکہ میں اس بات پر واضح طور پر زور دینا چاہتی ہوں۔

انہوں نے کہا کہ ’یہ ذاتی معاملہ تھا جس کے بارے میں لوگوں کو کافی غلط فہمی تھی جبکہ انہوں نے اس پر مزید وضاحت کرنے سے گریز کیا‘۔

رپورٹ کے مطابق زیر نگرانی کے حوالے سے کیے گئے میزبان کے سوال کے جواب میں پینگ شوائی نے کہا کہ ’وہ یمیشہ سے آزاد ہیں‘۔

یہ بیان سامنے آنے کے بعد چین کے سرکاری میڈیا کی جانب سے پینگ شوائی کی تصاویر بھی شیئر کی گئی ہیں جس میں وہ ٹینس کے ایک ٹورنامنٹ میں موجود ہیں جبکہ سرکاری میڈیا نے ان کے ای میل کا اسکرین شارٹ بھی شیئر کیا ہے جو انہوں نے ویمنز ٹینس ایسوسی ایشن کو لکھا جس میں انہوں نے ’سب ٹھیک ہے‘ لکھا ہے۔

اس بیان کے سامنے آنے کے بعد بھی عالمی تشویش کم نہیں ہوئی ہے اور ویمنز ٹینس ایسوسی ایشن کے سربراہ کا کہنا ہے کہ انہیں پینگ شوائی کی جانب سے کی گئی ای میل پر یقین کرنا مشکل لگ رہا ہے۔

واضح رہے کہ چینی ٹینس اسٹار پینگ شوائی نے گزشتہ ماہ چین کی کمیونسٹ پارٹی کے اعلی عہدیدار ژانگ گاؤلی پر جبری طور پر جنسی تعلقات قائم کرنے کی کوشش کا الزامات عائد کیا تھا جس کی وجہ سے عالمی سطح پر تشویش پیدا ہوگئی تھی۔

یاد رہے کہ ٹینس کی عالمی تنظٰیم (ڈبیلو ٹی اے) نے لاپتہ چینی ٹینس اسٹار پینگ شوائی کے معاملے پر چینی حکومت کے رویے کے بعد ٹورنامنٹ کی معطلی کا فیصلہ کیا تھا۔