کراچی میں بادلوں نے ڈیرے ڈال لئے، آج بھی بوندا باندی کا امکان ہے۔

محکمہ موسمیات کے مطابق شہرقائد میں دھند کا راج ہے جبکہ حد نگاہ 4 کلو میٹر تک محدود ہو گئی۔

آج کم سے کم درجہ حرارت 126 ڈگری سینٹی گریڈ ریکارڈ کیا گیا ،آج زیادہ سے زیادہ درجہ حرارت 26 ڈگری سینٹی گریڈ ریکارڈ ہونے کا امکان ہے۔

کراچی میں اس وقت ہوا میں نمی کا تناسب 44 فیصد ریکارڈ کیا گیا۔

محکمہ مو سمیات کے مطابق شہر میں 10 کلو میٹر فی گھنٹہ کی رفتار سے شمال مشرقی ہوا چل رہی ہے، آج مطلع جزوی ابر آلود رہے گا۔

کراچی میں بارشیں

مغربی ہواؤں کے سلسلے میں شہر میں آج شام سے بوندا باندی کا آغاز ہوگا، 25 تا 27  دسمبر شہر میں درمیانے درجے کی بارش کا امکان ہے جبکہ چند مقامات پر موسلادھار بارش بھی ہوسکتی ہے۔

محکمہ مو سمیات کے مطابق اس دوران ناصرف تیز ہواؤں کے ساتھ گرج چمک کا امکان ہے بلکہ سردی کی شدت میں بھی اضافہ ہوگا۔

موسم سرما کی بارشوں کا امکان، الرٹ جاری

پاکستان ڈیزاسسٹر مینجمنٹ اتھارٹی سندھ نے کراچی سمیت صوبے کے مختلف اضلاع میں ہفتے اور اتوار کو موسمِ سرما کی پہلی بارش کی پیشگوئی کے ساتھ ہی الرٹ جاری کردیا ہے۔

پی ڈی ایم اے سندھ کے مطابق کراچی، حیدرآباد، سکھر، میرپور خاص، دادو، جامشورو، لاڑکانہ، شہید بینظیر آباد میں بارشوں کا امکان ہے۔

پی ڈی ایم اے نے بلدیاتی اداروں سمیت ضلعی انتظامیہ کو بارشوں سے نمٹنے کے لیے اقدامات کی ہدایت کردی۔