صوبائی وزیر صحت ڈاکٹر یاسمین راشد نے کہا ہے کہ پنجاب کی تمام عوام کویکم جنوری سے یونیورسل ہیلتھ انشورنس کی سہولت فراہم کریں گے۔

ڈاکٹر یاسمین راشد کی زیر صدارت محکمہ اسپیشلائز ہیلتھ کئیراینڈ میڈیکل ایجوکیشن میں اہم اجلاس ہوا جس میں پنجاب کی عوام کو یونیورسل ہیلتھ انشورنس کی سہولت کی فراہمی کے اقدامات کا جائزہ لیاگیا۔

ڈاکٹریاسمین راشدنے اظہارخیال کرتے ہوئے کہا کہ وزیراعظم عمران خان کی جانب سے پنجاب کی عوام کیلئے یونیورسل ہیلتھ انشورنس بہترین تحفہ ہوگا۔

انہوں نے کہا کہ پنجاب کے تمام خاندانوں میں یونیورسل ہیلتھ کوریج کے حوالہ سے تمام اقدات آخری مراحل میں ہیں ۔

 صوبائی وزیر صحت کا کہناتھا کہ وزیراعظم عمران خان سب سے پہلے لاہوراور راولپنڈی کے تمام خاندانوں کو صحت سہولت کارڈ تقسیم کریں گے۔

 ڈاکٹر یاسمین راشدنے کہاکہ حکومت پاکستان اس منصوبہ پر330ارب روپے خرچ کررہی ہے، ڈی جی خان اور ساہیوال کی ڈویژنزکے تمام خاندان یونیورسل ہیلتھ انشورنس کی سہولت سے استفادہ کررہے ہیں۔

صوبائی وزیر صحت ڈاکٹر یاسمین راشد  نے مزید کہا کہ پنجاب کی عوام کو یونیو رسل ہیلتھ انشورنس کی فراہمی کیلئے زیادہ سے زیادہ ہسپتالوں کوا م پینل کیاجارہاہے، عمران خان پنجاب کی تمام عوام کویکم جنوری سے یونیورسل ہیلتھ انشورنس کی سہولت فراہم کریں گے۔

سیکرٹری صحت ڈاکٹراحمدجاویدقاضی نے اظہارخیال کرتے ہوئے کہا کہ صحت سہولت کارڈ کیلئے ہسپتالوں کو ام پینل کرنے کے حوالے سے اقدامات کاجائزہ لیاجارہاہے۔

اجلاس میں سیکرٹری صحت ڈاکٹراحمدجاویدقاضی،اسپیشل سیکرٹری محمد اجمل بھٹی،ایڈیشنل سیکرٹری ڈاکٹرآصف طفیل،ایڈیشنل سیکرٹری ڈاکٹرسلمان شاہدودیگرافسران نے شرکت کی۔