صوبائی وزیر صنعت وتجارت میاں اسلم اقبال نے کہا ہے کہ پنجاب حکومت کے عوام دوست اقدامات سے ہزاروں لوگوں کو ریلیف مل رہا ہے۔

میاں اسلم اقبال نے اپنی جاری کردہ بیان میں کہا کہ پرائس کنٹرول میکانزم پر موثر عملدرآمد سے اشیاء ضروریہ کی قیمتوں میں کمی آرہی ہے، صوبے پنجاب میں ہرجگہ 20 کلو آٹے کا تھیلا 1100روپے جبکہ چینی 90روپے فی کلو کے حساب سے یقینی بنائی گئی۔

صوبائی وزیر صنعت وتجارت کا کہنا تھا کہ صوبے بھر میں قائم 258سہولت بازار اور 32 ماڈل بازار عوام کے لئے ریلیف کا بڑا ذریعہ ہیں، ان بازاروں میں معیاری اشیاء ضروریہ ارزاں نرخوں پرمل رہی ہیں، جس سے روزانہ 80ہزار سے زائد لوگ خریداری کے لئے آتے ہیں۔

یہ بھی پڑھیں: منی بجٹ: پیٹرلیم لیوی، اشیائے خورونوش، کاسمیٹکس اور گاڑیوں کی قیمت میں اضافے کا امکان

انکا کہنا تھا کہ زرعی منڈیوں اور ماڈل بازاروں میں 123کسان پلیٹ فارمز بنائے گئے ہیں، کسان پلیٹ فارمز پر کسانوں کو اپنی اجناس براہ راست فروخت کرنے کی سہولت دی گئی ہے۔

میاں اسلم اقبال نے کہا کہ پرائس کنٹرول مجسٹریٹس اور متعلقہ اداروں کو قیمتوں کی مانیٹرنگ کے لئے پوری طرح متحرک کیا گیا ہے، انہوں نے ہدایت جاری کرتے ہوئے کہا کہ ذخیرہ اندازوں اور ناجائز منافع خوروں کے خلاف بلا امتیاز کارروائی جاری رکھی جائے گی۔

صوبائی وزیر صنعت وتجارت نے مزید کہا کہ صارفین کے حقوق کے تحفظ کے لئے متعلقہ ادارے اپنے فرائض تندھی اور جانفشانی سے سر انجام دیں۔