صوبائی وزیر صنعت و تجارت میاں اسلم اقبال نے کہا ہے کہ ملک میں گیس کے نئے ذخائر تلاش کئے جارہے ہیں۔

صوبائی وزیر صنعت و تجارت میاں اسلم اقبال نے نیو مزنگ میں نئی گیس پائپ لائن کے منصوبے کا افتتاح کردیا ہے، منصوبے کے تحت نیو مزنگ اور رسول پارک کی تمام گلیوں میں چار ہزار میٹر بوسیدہ پائپ لائن تبدیل کی جائے گی۔

صوبائی وزیر صنعت و تجارت میاں اسلم اقبال نے افتتاح کے بعد میڈیا سے گفتگو کرتے ہوئے کہا کہ منصوبے کی تکمیل سے ساڑھے تین ہزار گھروں کو فائدہ ہوگا، پکی ٹھٹی کے علاقے میں 7 ہزار میٹر بوسیدہ پائپ لائنیں تبدیل ہوں گی۔

انکا کہنا تھا کہ وفاقی حکومت گیس کی قلت پر قابو پانے کیلئے اقدامات کر رہی ہے، ملک میں گیس کے نئے ذخائر تلاش کئے جارہے ہیں۔
صوبائی وزیرنے کہا کہ گھریلو اور کمرشل سیکٹر دونوں کو گیس کی فراہمی ضروری ہے، حکومت دونوں سیکٹر کی گیس کی ضروریات پورا کرنے کے لئے کوشاں ہے۔

نیو مزنگ اور پکی ٹھٹہی میں ساڑھے 10 ہزار میٹر بوسیدہ گیس پائپ لائنوں کی تبدیلی سے گیس پریشر میں بہتری آئے گی، میری ٹیم کی گزشتہ چار سالوں کی محنت رنگ لائی ہے، علاقے کا گیس پریشر کی کمی کا دیرینہ مسئلہ حل ہوگا۔

صوبائی وزیر صنعت و تجارت میاں اسلم اقبال نے میڈیا سے گفتگو کرتے ہوئے مزید کہا کہ پاکستان تحریک انصاف کی حکومت وعدوں کی تکمیل کی جانب بڑھ رہی ہے، عوام سے کیا ہر وعدہ پورا کریں گے۔