‏اسلام آباد: صوبائی الیکشن کمشنر خیبر پختونخوا شریف اللہ کو عہدے سے ہٹا دیا گیا ہے۔

الیکشن کمیشن کی جانب سے جاری نوٹیفیکیشن کے مطابق ‏الیکشن کمشنر خیبر پختونخوا کو الیکشن کمیشن سیکریٹریٹ اسلام آباد رپورٹ کرنے کی ہدایت کی گئی ہے۔

تاہم ان کی معطلی کی وجہ تاحال سامنے نہیں آسکی ہے۔

شریف اللہ کی جگہ ‏ڈی جی لوکل گورنمنٹ الیکشن محمد رازق کو صوبائی الیکشن کمشنر خیبر پختونخوا تعینات کردیا گیا۔

خیال رہے کہ خیبر پختونخوا میں ہونے والے بلدیاتی انتخابات کے پہلے مرحلے میں حکمران جماعت تحریک انصاف کو شکست کا سامنا کرنا پڑا ہے، جبکہ مولونا فضل الرحمان کی جمیعت علمائے اسلام ایک بار پھر ابھر کر سامنے آئی اور انتخابی میدان اپنے نام کر لیا۔

اس حوالے سے جمعیت علما اسلام (ف) کے سربراہ مولانا فضل الرحمان کا کہنا تھا کہ بلدیاتی انتخابات نے ثابت کردیا پچھلے الیکشن میں دھاندلی ہوئی۔

کے پی کے بلدیاتی انتخاب میں 2032 امیدوار ایسے بھی تھے جو بلامقابلہ منتخب ہوئے۔

جبکہ انتخابی عمل کے دوران بیلٹ پیپرز کی چوری، ہاتھا پائی، فائرنگ اور گالم گلوچ جیسے ناخوشگوار واقعات بھی رونما ہوئے۔

انتخابات میں بدترین شکست پر وزیر اعظم عمران خان پاکستان تحریک انصاف کے رہنماوں سے نالاں ہیں، جبکہ پی ٹی آئی رہنما شکست کا ملبہ ایک دوسرے پر ڈال رہے ہیں۔

خیبر پختونخوا کے بلدیاتی انتخابات میں تحریک انصاف کی ناکامی عوام کا بدلتا ہوا رجحان واضح کر رہی ہے۔