سوئی ناردرن گیس نے گیس کی قیمت میں مجموعی طورپر 907 روپے فی یونٹ اضافے کا مطالبہ کر دیا ہے۔

تفصیلات کے مطابق  سوئی ناردرن گیس کی طرف سے گیس کی قیمت میں اضافے کی درخواست دائر ہونے پر اوگرا نے لاہور کے مقامی ہوٹل میں عوامی سماعت کی۔

 اس موقع پر ایم ڈی ایس این جی پی ایل نے کہا کہ کمپنی گیس خرید کر صارفین کو مہیا کرتی ہے، گزشتہ برسوں میں کمپنی کو اربوں روپے کا نقصان ہوا جس کی وجہ سے مجموعی طور پر 907 روپے اور رواں سال کے دوران بلند قیمت پر گیس خریدی گئی جس کی وجہ سے 269 روپے فی یونٹ اضافہ کرنا ہوگا۔

ممبر اوگرا نے سماعت کے دوران ریمارکس دئیے کہ سوئی گیس حکام کی سرزنش کرتے ہوئے کہا کہ محکمہ اپنے منصوبوں کی تفصیلات فراہم نہیں کرتا اس حوالے سے چھ ماہ قبل خط بھی لکھا گیا ایسا رویہ ٹھیک نہیں۔

چیئرمین اوگرا مسرور خان نے عوامی سماعت کے بعد میڈیا سے بات چیت کرتے ہوئے کہا کہ گیس تقسیم کرنے والی کمپنیوں کو سپورٹ کرنا ہوگا کیونکہ مہنگی گیس درآمد کرکے سستے داموں فروخت کرنا ممکن نہیں، اس وقت پاکستان کا سب سے بڑا چیلنیج گیس کی فراہمی ہے۔

سوئی گیس حکام کا کہنا تھا کہ روزانہ 850 سے 900 ایم ایم بی ٹی یو گیس موجود ہوتی ہے جبکہ باقی ضرورت مہنگی درآمدی گیس سے پوری کی جا رہی ہے، سردیوں میں مانگ کے مطابق گیس فراہم کرنے کی کوشش کریں گے۔