اسلامی تعاون تنظیم (او آئی سی) میں شعبہ سیاسی امور کے ڈائریکٹر جنرل طارق علی بخیت کو او آئی سی کا نمائندہ خصوصی برائے افغانستان مقرر کر دیا گیا۔

طارق علی بخیت اسلامی تعاون تنظیم (اوآئی سی ) کے سیکرٹری جنرل ابراھیم حسین طحہ کے اسسٹنٹ سیکرٹری جنرل برائے انسانی، ثقافتی اور سماجی امور تھے۔ انہیں وزرائے خارجہ کونسل کی قرارداد پر عمل درآمد کرنے کی ذمہ داری سونپی گئی ہے۔

طارق علی افغان عوام کو انسانی امداد کی فراہمی کے لیے مربوط کوششوں کے حوالے سے کام کریں گے اور افغانستان کے لیے انسانی امداد اور مدد کے پروگرام کو مربوط بنائیں گے۔

بخیت کو افغانستان کے بارے میں او آئی سی کے 17ویں غیر معمولی اجلاس کے اختتام پر مقرر کیا گیا ہے، آپ افغانستان کی اقتصادی اور سیاسی مشغولیت کو بھی آگے بڑھائیں گے۔

 او آئی سی کے 17ویں غیر معمولی اجلاس کا مقصد افغانستان کے انسانی بحران پر بین الاقوامی اتفاق رائے پیدا کرنا اور ملک کی معاشی تباہی کو روکنا تھا۔

اعلامیے کے مطابق طارق علی بخیت کی تقرری افغانستان میں ابھرنے والے انسانی المیے کو روکنے کے لیے اجتماعی کوششوں کو بروئے کار لانا ہے۔ ان کی تقرری سے او آئی سی اسلام آباد کے اعلامیہ پر عملدرآمد میں مدد ملے گی۔

طارق علی بخیت نے 1988 میں سوڈانی خارجہ سروس میں شمولیت اختیار کی، انہوں نے خرطوم میں وزارت خارجہ کے اندر اور لاگوس اور نیویارک میں سوڈان کے سفارتی مشنوں میں مختلف عہدوں پر خدمات انجام دیں۔

طارق علی نے او آئی سی کے علاوہ عرب لیگ اور افریقی یونین سمیت کئی بین الحکومتی اداروں کے ساتھ کام کیا ہے۔ انہوں نے ناوابستہ تحریک کی وزارتی اور سربراہی سطح کے اجلاسوں میں شرکت کی۔

طارق علی بخیت نیویارک میں اقوام متحدہ کی جنرل اسمبلی کے اجلاسوں، انسانی حقوق کمیشن اور جنیوا میں انسانی حقوق کونسل کے اجلاسوں میں بھی شرکت کی ہے۔

طارق علی نے 2004 میں بین الاقوامی تنظیموں کے ساتھ تعاون کے انچارج ڈائریکٹر کے طور پر او آئی سی میں شمولیت اختیار کی اور کئی بین الاقوامی اور علاقائی اجلاسوں میں او آئی سی کی نمائندگی کی۔

طارق علی بخیت کو 2015 میں اسلامی تعاون تنظیم کا ڈائریکٹر جنرل مقرر کیا گیا تھا۔