کراچی کے بعد اسلام آباد میں بھی کورونا کی اومیکرون قسم کا پہلا کیس سامنے آگیا ہے۔

بول نیوز کے مطابق شہر قائد کے بعد وفاقی دارالحکومت اسلام آباد میں بھی کورونا کی اومیکرون قسم کا پہلا کیس سامنے آگیا ہے۔

ذرائع کا کہنا ہے کہ اومیکرون کا شکار مریض مرد ہے اور اس کی حالت خطرے سے باہر ہے۔

متعلقہ خبر: کراچی میں اومیکرون کا دوسرا کیس، متاثرہ شخص ہوٹل سے فرار

اومیکرون کا مریض چند روز قبل کراچی سے آیا تھا، متعلقہ حکام مریض کے عزیز و اقارب اور دیگر کے ٹیسٹ کررہے ہیں جب کہ گزشتہ چند روز کے دوران اس سے ملاقات کرنے والوں سے بھی رابطے کئے جارہے ہیں۔

ڈی ایچ او اسلام آباد زعیم ضیا کا کہنا ہے کہ جس شخص میں اومیکرون کی تشخیص ہوئی ہے اس کی بیرون ممالک کوئی ٹریول ہسٹری نہیں۔

زعیم ضیا کا کہنا تھا کہ اومی کرون وئرینٹ کا مقابلہ ماضی کی طرح کیا جائے گا ، اومی کرون ویرینٹ سے نمٹنے کیلیے ہیلتھ ٹیمیں تیار ہیں۔

ڈی ایچ او اسلام آباد نے مزید کہا کہ شہری احتیاطی تدابیر اختیار کریں اور ویکسی نیشن کروائیں، ویکسین کی دو خوراک لینے والے شہری اگر بوسٹر ویکسین کے اہل ہیں تو بوسٹر لگوائیں۔

اب تک ملک میں اومیکرون کے کیسز صرف کراچی میں سامنے آئے ہیں، قلات میں چند روز قبل اومیکرون کے مشتبہ مریض سامنے آئے تھے تاہم اب تک ان میں اس وائرس کی تصدیق نہیں ہوسکی۔

متعلقہ خبر: اومیکرون کے 12 مشتبہ کیسز کے بعد بلوچستان بھر میں ہائی الرٹ

عالمی ماہرین اومیکرون کو اب تک کورونا کی سب سے زیادہ تیزی سے پھیلنے والی قسم قرار دے رہے ہیں ، برطانیہ سمیت یورپ کے کئی ملکوں میں اس وائرس کی وجہ سے دوبارہ مختلف اقسام کی پابندیاں لگائی گئی ہیں۔