ایشز سیریز کے دوسرے پنک بال ڈے نائٹ ٹیسٹ میچ میں آسٹریلیا نے انگلینڈ کو شکست دے کر نئی تاریخ رقم کر دی۔

ایڈیلیڈ اوول میں ہونے والے ایشز سیریز کے دوسرے ٹیسٹ میچ میں آسٹریلیا نے انگلینڈ کو 275 رنز سے شکست دے دی ، آسٹریلیا نے عالمی کرکٹ میں پنک بال ڈے نائٹ ٹیسٹ میچز کی نئی تاریخ بھی رقم کر دی۔

آسٹریلیا نے 2015 میں اپنا پہلا پنک بال ٹیسٹ ایڈیلیڈ اوول میں نیوزی لینڈ کے خلاف کھیلا تھا، جس میں 3 وکٹوں سے کامیابی حاصل کی تھی۔

آسٹریلیا نے 2015 میں اپنے ابتدائی پنک بال ڈے نائٹ ٹیسٹ میچ سے لے کر آج تک 9 پنک بال ٹیسٹ میچ کھیلے ہیں اور تمام 9 میچوں میں کامیابی حاصل کی ہے۔

آسٹریلیا کے ایڈیلیڈ اوول گراؤنڈ میں آسٹریلیا نے سب سے زیادہ 6 پنک بال ٹیسٹ میچ کھیلے ہیں۔ جبکہ دو میچز برسبین اور ایک میچ پرتھ میں کھیلا۔

پنک بال ڈے نائٹ ٹیسٹ کرکٹ کی تاریخ میں آسٹریلیا کامیابی کے سو فی صد تناسب کے ساتھ سب سے آگے ہے۔

آسٹریلیا نے 2015 میں نیوزی لینڈ کو 3 وکٹوں سے شکست دی تھی۔ 2016 میں جنوبی افریقہ کے خلاف 7 وکٹوں سے فتح حاصل کی تھی، 2016 میں ایک دلچسپ مقابلے کے بعد پاکستان کو 39 رنز سے زیر کیا تھا۔

انگلینڈ کو 2017 میں 120 رنز کے مارجن سے پچھاڑا، 2019 میں سری لنکن ٹیم کو ایک اننگ اور 40 رنز سے شکست دی۔

 اسی سال پاکستان کو بھی آسٹریلیا کے ہاتھوں پنک بال ٹیسٹ میچ میں ایک اننگ 48 رنز کی ہزیمت آمیز شکست کا سامنا کرنا پڑا تھا، 2019 میں نیوزی لینڈ نے بھی آسٹریلیا کے ہاتھوں 296 رنز کی شکست کا مزہ چکھا۔

 اور رواں سال کے ماہ دسمبر کے آخری عشرے میں 275 رنز سے آسٹریلیا نے انگلینڈ کو شکست سے دوچار کیا۔