قومی کرکٹ ٹیم کے کپتان بابر اعظم کا کہنا ہے کہ جس طرح کھلاڑیوں کی ٹیم مکمل ہے اس طرح تمام کوچز ہونے چاہیئں۔

بابر اعظم نے ورچوئل پریس کانفرنس کے دوران کہا کہ ویسٹ انڈیز کے خلاف سیریز بہت اہم ہے، ہوم سیریز میں فتوحات کا تسلسل برقرار رکھنے کی کوشش کریں گے، ہماری ٹیم محنت کررہی ہے، اچھی بات یہ ہے کہ تمام کھلاڑی ایک دوسرے کا ساتھ دے رہے ہیں، ہماری انگلینڈ اور نیوزی لینڈ کی سیریز منسوخ ہوئی تھی، ویسٹ انڈیز کو خوش آمدید کہتا ہوں کہ وہ پاکستان آئے۔

متعلقہ خبر: بابر اعظم اپنے کیریئر میں ویرات اور ٹنڈولکر سے بھی آگے

قومی ٹیم کے کپتان نے مزید کہا کہ ہم نے یہ نہیں سوچ رہے کہ ویسٹ انڈیز کے کچھ کھلاڑی نہیں آئے، ویسٹ انڈیز کی موجودہ ٹیم کو بھی آسان نہیں لیا جاسکتا، ویسٹ انڈیز کی ٹیم میں جو کھلاڑی موجود ہیں وہ سی پی ایل کھیل چکے ہیں۔

قومی ٹیم کے قائم مقام ہیڈ کوچ ثقلین مشتاق کے حوالے سے بابر اعظم نے کہا کہ ثقلین مشتاق کی کوچنگ بہت اچھی ہے، ثقلین مشتاق سے کافی کچھ سیکھنے کو ملتا ہے، ان کی کوشش یہی ہوتی ہے کہ پاکستان کے لیے کھیلنا ہے اپنے لیے نہیں۔

قومی ٹیم کے سپورٹنگ اسٹاف میں کوچز کے حوالے سے بابر اعظم نے کہا کہ جس طرح کھلاڑیوں کی ٹیم مکمل ہے اس طرح ٹیم میں کوچز بھی پورے ہونے چاہیئں۔

متعلقہ خبر: بابر اعظم کی کپتانی میں بہتری آئے گی ، معین خان

3 ویسٹ انڈین کھلاڑیوں کے کوویڈ ٹیسٹ مثبت آنے سے متعلق بابر اعظم نے کہا کہ ہر ٹیم کو کورونا وبا کے باعث مشکلات پیش آتی ہے، اگر کسی کھلاڑی کا ٹیسٹ مثبت آجائے تو افسوس ہوتا ہے۔

واضح رہے کہ پاکستان اور ویسٹ انڈیز کے درمیان ٹی ٹوئنٹی اور ایک روزہ سیریز کراچی میں کھیلی جائے گی۔