سینیٹر رحمان ملک کا کہنا ہے کہ پاکستان کا آئین قائداعظم کے رہنما اصولوں کے مطابق اقلیتوں کے حقوق کا ضامن ہے۔

سینیٹر رحمان ملک نے قائد اعظم کے یوم پیدائش   کے موقع پر پیغام دیتے ہوئے کہا کہ بابائے قوم قائداعظم کے یوم پیدائش پر پوری قوم   کو مبارکباد پیش کرتا ہوں۔

اسکے علاوہ سینیٹر رحمان ملک نے کرسمس کے موقع پرمسیحی بہن بھائیوں کو مبارکباد دیتے ہوئے کہا کہ پوری قوم مسیحی برادری کیساتھ کرسمس کی خوشیوں میں شریک ہے۔

 سینیٹر رحمان ملک کا کہنا تھا کہ کرسمس محبت اور امن کی عکاسی کرتا ہے، آج محبت کے پرچار کا دن ہے۔

سینیٹر رحمان ملک نے کہا کہ ملک کی تعمیر و ترقی اور امن و امان کیلئے مسیحی برادری کے کردار کو خراج تحسین پیش کرتا ہوں۔

دنیا بھر کی طرح پاکستان میں بھی مسیحی برادری آج 25 دسمبر کو کرسمس کا تہوار انتہائی جوش و خروش، مذہبی تزک و احتشام اور روایتی جذبہ کے ساتھ منا رہی ہے۔

اس دن کی مناسبت سے کرسمس ٹریز کی تیاری کے ساتھ ساتھ تمام چرچز کو انتہائی خوبصورتی سے سجایا گیا ہے۔

سال بھر کا انتظار ختم ہوتے ہی گلی محلوں، گرجا گھروں اور رہائش گاہوں کو برقی قمقموں اور دیدہ زیب سجاوٹی سامان سے سجا دیا گیا جبکہ چرچ اور گرجا گھروں میں عبادات کا سلسلہ بھی جاری ہے۔

واضح رہے کہ مسیحی برادری حضرت عیسٰی علیہ السلام کی ولادت کی خوشی میں ہرسال 25دسمبر کو کرسمس کا تہوار مناتی ہے، جس میں عیسائی برادری کی جانب سے گرجا گھروں اور رہائشی عمارتوں کو برقی قمقموں اور پھولوں کے ساتھ نہایت خوبصورتی سے سجایا جاتا ہے۔