جاپان میں تنہائی کا راج ہے اور یہی وجہ ہے کہ لوگ روبوٹ کو اپنے گھر کا ایک فرد سمجھتےہیں۔ اب یوکائی کارپوریشن نے اسٹف ٹوائزروبوٹ کے دو خوبصورت ماڈل تیار کئے ہیں۔

ان میں سے ہر روبوٹ کی خاصیت الگ ہے مثلاً ایک روبوٹ کے منہ میں انگلی ڈالنے سے وہ اسے اپنے ہونٹوں سے دباتا ہے اور یوں آپ کے پالتو ہونے کا احساس دلاتا ہے۔

لیکن یہ روبوٹ دودرجن سے زائد معصومانہ حرکات کرتا ہے جسے ایک خاص الگورتھم سے ممکن بنایا گیا ہے۔ دلچسپ بات یہ ہے کہ اس الگورتھم کا نام ہیم گورتھم رکھا گیا ہے کیونکہ جاپانی زبان میں ہیم کا مطلب انگلی پر نرمی سے کاٹنا ہوتا ہے۔ اس کی خاص بات یہ ہے کہ اسے گود میں لیں تو کسی بچے کا گمان ہوتا ہے۔

اس روبوٹ کا ایک مقصد بچوں کو پالتو جانوروں سے مناسب رویہ سکھانا ہے۔ ہرجاپانی گھر میں کوئی نہ کوئی پالتوجانور ہوتا ہے اور اکثر بچے ان کے ساتھ بہتر برتاؤ نہیں کرتے۔ اس طرح ہم اسے ذہنی تناؤ دور کرنے والا اوراور بچوں کی تربیت کرنے والا روبوٹ بھی کہہ سکتے ہیں۔

اسی کمپنی نے بوکو ایمو نامی روبوٹ بھی بنایا ہے جو مریضوں کی دیکھ بھال کرتا ہے۔ بوکو روبوٹ نام کا یہ طبی روبوٹ بہت ہی حساس اور پیچیدہ ہے۔ اس میں لگے کئی سینسر مریضوں کی جسمانی کیفیات نوٹ کرکے ہسپتال یا ڈاکٹر تک بھیجتے رہتے ہیں۔ ان میں تھرمامیٹر، آکسی میٹر، نبض پیما اور دیگرسینسر موجود ہیں۔ یہ روبوٹ اپنے چہرے کے تاثرات سے مریض کو خوش رکھنے کی کوشش بھی کرتا ہے۔