مملکتِ شام کیلئے نامزد پاکستانی سفیر سعید محمد خان نے وزیر برائے مذہبی امور پیر نور الحق قادری اور سیکریٹری مذہبی امور سے ملاقات کی۔

دورانِ ملاقات پیر نورالحق قادری نے کہا کہ پی آئی اے کے ساتھ شام کیلئے ہفتہ وار دو پروازیں چلانے پر بات چیت کی جائے۔

وفاقی وزیر برائے مذہبی امور نے کہا کہ نئی زیارت پالیسی کے حوالے سے شام کے ساتھ ایم او یو پر کام تیز تر کیا جائے اور پاکستانی زائرین کیلئے ملک شام میں بہتر سہولیات کی فراہمی کو یقینی بنائی جائے۔

پی نور الحق قادری نے کہا کہ زائرین کی سہولیت کیلئے پی آئی اے اور شامی فضائی کمپنی شام ونگ کے مابین کوڈ شیئرنگ کا بندوبست کیا جائے، کوڈ شیئرنگ کے بعد زائرین ایک ہی سفر میں نجف اور دمشق  میں حاضری دے سکیں گے۔

انوہں نے مزید کہا کہ شام کے پاکستانی سفارتخانے میں قائم زیارت ڈیسک کو مزید فعال کیا جائے، ساتھ ہی پاکستانی طلباء کا شامی اسلامک اسکول “مجمع ابو النور” اور “معھد الفتح “میں داخلوں کا بندوبست کیا جائے۔

وفاقی وزیر مذہبی برائے امور پیر نور الحق قادری نے سعودی عرب کیلئے نامزد پاکستانی سفیر سے بھی ملاقات کی۔

وزیر مذہبی امور نے نامزد سفیر خرم امین راٹھور سے حج اور عمرہ کے حوالے سے تفصیلی بات چیت کی۔

ملاقات میں پاکستانی عمرہ زائرین کو سہولیات کی فراہمی، آئندہ حج انتظامات، حج کوٹہ اور کورونا SOPs پر گفتگو ہوئی۔

وزیر مذہبی امور نے نامزد پاکستانی سفیر کو عمرہ زائرین کیلئے قرنطینہ کی شرائط نرم کروانے کے حوالے سے ہدایات دیں، ساتھ ہی کہا کہ مدینہ منورہ میں نئے پاکستان ہاوس کی تعمیر کی کوششیں تیز کی جائیں۔