حکومت جاپان نے کہا ہے کہ ملک کے شمال مشرقی ساحل کے نزدیک گہرے سمندر میں موجود دو گھاٹیوں میں سے کسی ایک میں بڑا زلزلہ آنے کی صورت میں لگ بھگ 2 لاکھ افراد لقمہ اجل بن سکتے ہیں۔

ماہرین کا ایک سرکاری پینل چیشیما ٹرینچ اور جاپان ٹرینچ میں زلزلہ آنے اور اس کے نتیجے میں تسونامی لہروں سے ہونے والے ممکنہ نقصانات کا جائزہ لے رہا تھا۔

ماہرین نے چیشیما ٹرینچ کا جائزہ لیا جو کُورِل آئرلینڈز کے نزدیک سمندر سے شروع ہو کر ہوکائیدو تک جاتی ہے۔ جاپان ٹرینچ کے نزدیک جائزہ لیا جانے والا علاقہ ہوکائیدو کے نزدیک پانیوں سے لے کر ایواتے پریفیکچر تک پھیلا ہوا ہے۔

 اس جائزے کا آغاز سنہ 2011 میں شمال مشرقی جاپان میں قدرتی آفت آنے کے بعد شروع کیا گیا تھا۔

پینل نے منگل کے روز جاری کردہ رپورٹ میں کہا ہے کہ جاپان ٹرینچ میں 9.1 میگنی چیوڈ کا زلزلہ آنے کی صورت میں 10 میٹر سے زائد بلند تسونامی لہریں توہوکُو علاقے کے حصوں اور ہوکائیدو تک پہنچ سکتی ہیں۔

رپورٹ میں یہ بھی تخمینہ لگایا گیا ہے کہ 1 لاکھ 99 ہزار افراد لقمہ اجل بن سکتے ہیں اور 2 لاکھ 20 ہزار مکانات اور عمارتیں مکمل طور پر منہدم ہو سکتی ہیں۔

پینل نے چیشیما ٹرینچ پر 9.3 میگنی چیوڈ کے زلزلے کے اثرات کا بھی اندازہ لگایا ہے۔ اس کے مطابق زلزلے سے 20 میٹر سے زائد بلند لہریں ہوکائیدو کے مشرقی حصوں سے ٹکرا سکتی ہیں، جس سے 1 لاکھ تک افراد لقمہ اجل بن سکتے ہیں اور 84 ہزار مکانات منہدم ہو سکتے ہیں۔