قومی اسمبلی اجلاس میں پاکستان پیپلز پارٹی کی شگفتہ جمانی  نے پی ٹی آئی کی غزالہ سیفی کو تھپڑ ماردیا۔

حکومت نے منی بجٹ قومی اسمبلی میں پیش کردیا جس پر اپوزیشن کی جانب سے شدید احتجاج کیا گیا۔

اجلاس کے آغاز سے ہی اپوزیشن جماعتوں نے قومی اسمبلی میں احتجاج شروع کردیا تھا اور اپنی نشستوں سے اٹھ کر اسپیکر قومی اسمبلی کے ڈائس کے قریب جمع ہوگئے اور نعرے بازی شروع کردی۔

قومی اسمبلی میں شورشرابے اور ہنگامہ آرائی کے دوران پیپلز پارٹی کی خاتون رکن قومی اسمبلی شگفتہ جمانی نے حکومتی جماعت تحریک انصاف کی رکن غزالہ سیفی کو  تھپڑ مار دیا۔

Advertisement

قومی اسمبلی میں خواتین ارکان کی بھی ہنگامہ آرائی
شگفتہ جمانی نے غزالہ سیفی کو تھپڑ مار دیا#BOLNews #BreakingNews #MiniBudget #MiniBudget2021 #PMImranKhan #Opposition #NASession pic.twitter.com/hTW4EQYGnm

— BOLNetwork (@BOLNETWORK) December 30, 2021

شگفتہ جمانی اور غزالہ سیفی کے درمیان ہاتھا پائی شروع ہوئی جس پر غزالہ سیفی کی انگلی زخمی ہوگئی اور وہ غصے سے چلی گئیں اور کہاکہ ان کو جنگل میں جا کر رہنا چاہئے، یہ اس ملک میں اور ایوان میں رہنے کے قابل نہیں ہیں۔

دوسری جانب اپنے ایک بیان میں پی ٹی آئی رہنماء خرم شیر زمان نے پیپلز پارٹی کی خاتون رکن شگفتہ جمانی کی غزالہ سیفی سے ہاتھا پائی پر مذمت کی۔

تحریک انصاف کے رہنما خرم شیر زمان نے کہا ہےکہ پیپلز پارٹی کے ارکان سیاسی تربیت سے دور ہیں، یہ اسمبلی میں بیٹھنے کے قابل نہیں۔

انہوں نے کہا کہ غزالہ سیفی کے ساتھ پیپلز پارٹی کی رہنماء کا رویہ قابل مذمت ہے، پیپلز پارٹی کے لوگ پارلیمنٹ کا احترام کرنا اپنی ذاتی توہین سمجھتے ہیں۔

خرم شیر زمان نے کہا کہ اپوزیشن جماعتوں نے ایوان کو اکھاڑا سمجھا ہوا ہے، اپوزیشن آئین سازی میں کردار نبھانے کے بجائے انتشار کو ہوا دینے پر یقین رکھتی ہے۔

انکا کہنا تھا کہ پیپلز پارٹی کے ارکان سیاسی تربیت سے دور ہیں،یہ اسمبلی میں بیٹھنے کے قابل نہیں۔ اسپیکر قومی اسمبلی ایوان کا تقدس پامال کرنے والے اپوزیشن ارکان کیخلاف کارروائی کریں۔