معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے کہا ہے کہ ہم نے کراچی میں گرین لائن منصوبہ شروع کیا جس کا ن لیگ نے خالی وعدہ کیا تھا۔

حسان خاور نے مریم اونگزیب کے بیان پر ردِ عمل دیتے ہوئے کہا کہ آج لاہور میں وزیر اعظم عمران خان نے لاہور ٹیکناپولس کا سنگِ بنیاد رکھا، حسبِ توقع مسلم لیگ ن کو اس سے خاصی تکلیف ہوئی۔

ان کا کہنا تھا کہ مریم اورنگزیب صاحبہ نے 2014 میں اس منصوبے کو شروع کرنے اور افتتاح کرنے کا دعویٰ کر دیا، 2018 میں ن لیگی حکومت جانے کے وقت یہاں صرف ایک دیوار تھی اور ایک گیٹ لگا ہوا تھا۔

انہوں نے کہا کہ یہاں کسی قسم کی ترقیاتی سرگرمی، یونیورسٹی وغیرہ کا نام و نشان نہ تھا، ہمیں بتایا گیا کہ اس منصوبے پر 2018 تک ڈیڑھ سے 2 ارب روپے لگائے جا چکے ہیں، ڈیڑھ 2 ارب کی یہ دیوار اور گیٹ مسلم لیگ ن کو مبارک ہو۔

حسان خاور کا کہنا تھا کہ وزیرِ اعظم کا ویژن ہے کہ تمام بند اور تاخیر کا شکار منصوبوں کو جلد از جلد مکمل کیا جائے، وزیرِ اعلیٰ پنجاب سردار عثمان بزدار نے اس جگہ کو اسپیشل ٹیکنالوجی زون قرار دیکر کام کا آغاز کروایا۔

ان کا کہنا تھا کہ آج بھی وہاں امریکہ اور چائنہ کی دو لیڈنگ یونیورسٹیوں کے نمائندگان موجود تھے، یہاں ٹیکنالوجی کمپنیاں پاکستان میں ٹیکنالوجی انقلاب لانے میں مدد گار ثابت ہوں گی۔

انہوں نے کہا کہ مسلم لیگ ن کا گلہ یہ ہے کہ ہم ان کے سوچے ہوئے منصوبوں پر عمل کرنا شروع کیا ہے، جن منصوبوں پر ن لیگ نے تصویریں کھنچوائیں، ہم انہیں بھی عوامی فائدے کے لیے مکمل کر رہے ہیں۔

حسان خاور کا کہنا تھا کہ موجودہ حکومت نے اربوں کا نقصان اٹھا کر اورنج لائن منصوبہ مکمل کر کے چلایا، ہم نے کراچی میں گرین لائن منصوبہ شروع کیا، جسکا ن لیگ نے خالی وعدہ کیا تھا۔

انہوں نے کہا کہ اگر ن لیگ لاہور ٹیکنوپولس آ کر تصویریں کھنچوانا چاہے تو ہم انکا استقبال کریں گے۔

معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور کا مزید کہا کہ ن لیگ کم از کم یہ سوچے کہ اس منصوبے سے عوام بالخصوص لاہور کا بھلا ہو گیا، وزیرِ اعظم عمران خان اور سردار عثمان بزدار پنجاب کے لیے گیم چینجر منصوبوں کو آگے لا رہے ہیں۔