وزیر خارجہ مخدوم شاہ محمود قریشی نے کہا ہے کہ پائیدار ترقی کیلئے تجارتی اور اقتصادی تعاون انتہائی اہمیت کا حامل ہے۔

اسلام آباد، تہران، استنبول (آئی ٹی آئی) مال بردار ٹرین کی افتتاحی تقریب میں بطور مہمان خصوصی وزیر خارجہ مخدوم شاہ محمود قریشی نے شرکت کی جہاں انہوں نے شرکاء سے خطاب کیا جبکہ وزیر ریلوے، اعظم خان سواتی اور مشیر برائے تجارت عبدالرزاق داؤد نے بھی اسلام آباد، تہران، استنبول مال بردار ٹرین کی افتتاحی تقریب سے خطاب کیا۔

  اس موقع پر وزیر خارجہ مخدوم شاہ محمود قریشی نے ” آئ، ٹی، آئ” اقدام کو سراہتے ہوئے، وزیر ریلوے اور ان کی پوری ٹیم کو مبارکباد دی۔

انہوں نے کہا کہ یہ واقعی تین برادر ممالک پاکستان، ایران اور ترکی کے لیے ایک تاریخی اور اہم موقع ہے، ریل لنک کے ذریعے اپنے علاقوں کو دوبارہ جوڑنے کا  کا مقصد بالآخر پورا ہو رہا ہے۔

وزیر خارجہ نے کہا کہ آج ہماری اجتماعی کوششیں,  نتیجہ خیز ثابت ہو رہی ہیں  کیونکہ ہم ریل رابطے کے ذریعے اپنی تجارت کو آگے بڑھانے کے نئے دور کا آغاز کر رہے ہیں۔

شاہ محمود قریشی کا کہنا تھا کہ آئی ٹی آئی مال بردار ٹرین منصوبہ، ہماری خطے میں روابط بڑھانے کی سوچ کا مظہر ہے۔

ان کا کہنا تھا کہ معاشی تحفظ کے وژن کو عملی جامہ پہنانے کے لیے پاکستان نے اپنی توجہ جغرافیائی معیشت پر مرکوز کی ہوئی ہے، اس مقصد کے حصول کیلئے علاقائی روابط کا فروغ ہماری ترجیحات میں شامل ہے

وزیر خارجہ کا یہ بھی کہنا تھا کہ آئی ٹی آئی کارگو ٹرین پاکستان، ایران اور ترکی کو جوڑتی ہے اور یہ نہ صرف پاکستان سے ترکی تک کارگو کی ضرورت کو پورا کرتی ہے بلکہ یہ یورپ سے پاکستان، چین اور جنوبی ایشیا کے لیے ٹرانزٹ بھی فراہم کر سکتی ہے۔

شاہ محمود قریشی نےکہا کہ اسی طرح ہمارے خطے سے سامان وسطی ایشیا، یورپ اور اس سے آگے بھیجا جا سکتا ہے، طویل مدتی اور پائیدار ترقی کے لیے تجارتی اور اقتصادی تعاون انتہائی اہمیت کا حامل ہے ۔

انہوں نے کہا کہ ہمیں اپنے علاقائی تجارتی اور اقتصادی تعاون کو بڑھانے کے لیے ٹھوس اقدامات کرنے چاہئیں، مجھے یقین ہے کہ اگر اس منصوبے سے پوری طرح استفادہ کیا گیا تو یہ منصوبہ ہمارے خطے کے لیے معاشی طور پر گیم چینجر ثابت ہو گا۔

شاہ محمود قریشی نے کہا کہ ہم آئی ٹی آئی مال بردار ٹرین کے ساتھ ساتھ، مسافر ٹرین سروس کے اجراء کے بھی متمنی ہیں تاکہ ہمارے تینوں ممالک کے درمیان عوامی روابط بڑھ سکیں اور لوگوں اور ثقافتوں کو قریب لانے کے مواقع میسر آ سکیں۔

تقریب سے خطاب کرتے ہوئے وزیر خارجہ مخدوم شاہ محمود قریشی کا مزید کہنا تھا کہ میں ایک بار پھر پاکستان، ایران اور ترکی کی ریلوے ٹیموں اور ای سی او سیکرٹریٹ کی گراں قدر کوششوں اور تعاون کو سراہتا ہوں۔