وزیر مملکت اطلاعات و نشریات فرخ حبیب نے کہا ہے کہ وزیر اعظم عمران خان نے 90 لاکھ اوورسیز پاکستانیوں کے ساتھ الیکشن سے قبل جو وعدہ کیا تھا وہ پورا کردکھایا۔

فرخ حبیب سے پی ٹی آئی برطانیہ کے صدر عبد الستار رانا اور سینئر نائب صدر ملک عمران خلیل نے ملاقات کی جس میں اوورسیز پاکستانیوں کے مسائل کے حل، بیرون ممالک میں پاکستانی مشنز کے کردار اور دیگر امور پر تبادلہ خیال کیا گیا۔

ملاقات میں پی ٹی آئی برطانیہ کے عہدیداران نے بیرون ممالک مقیم پاکستانیوں کو ووٹ کا حق دینے پر وزیراعظم عمران خان اور انکی ٹیم کا شکریہ ادا کیا۔

وزیر مملکت کا کہنا تھا کہ ماضی میں تمام حکومتوں کو اوورسیز پاکستانیوں کی ترسیلات سے تو پیار تھا لیکن وہ انھیں ووٹ کا حق دینے کے خلاف تھے، وزیر اعظم عمران خان نے 90 لاکھ اوورسیز پاکستانیوں کے ساتھ الیکشن سے قبل جو وعدہ کیا تھا وہ پورا کر دکھایا۔

فرخ حبیب نے کہا کہ وزیر اعظم عمران خان نے برطانیہ سمیت دنیا بھر میں قائم پاکستانی مشنز کو واضح ہدایات دے رکھی ہیں کہ پاکستانیوں کے مسائل کو فوری حل اور ہر ممکن سہولیات فراہم کریں۔

اس موقع پر عبد الستار رانا کا کہنا تھا کہ بیرون ملک مقیم پاکستانیوں کے لئے روشن ڈیجیٹل اکاؤنٹ، اپنا گھر سکیم جیسے پروگرامات کے اجراء پر پی ٹی آئی حکومت کے مشکور ہیں۔

ملک عمران خلیل نے کہا کہ آئندہ الیکشن میں دنیا بھر میں مقیم پاکستانی عمران خان کو ووٹ دیں گے۔

پی ٹی آئی برطانیہ کی قیادت نے اوورسیز پاکستانیوں کے لیے پاور آف اٹارنی کے اجرا کے لیے آٹو میشن نظام متعارف کرانے پر وزیر اعظم عمران خان کا شکریہ ادا کیا۔

پاور آف اٹارنی کی آن لائن تصدیق اور اجراء سے ہزاروں سمندر پار پاکستانیوں کو فائدہ ہوگا، پرانے کرپٹ نظام سے فائدہ اٹھانے والے ملک میں تبدیلی نہیں چاہتے تھے۔