گورنر سندھ عمران اسماعیل نے کہا ہے کہ جرائم پر قابو پانے کے لیے پولیسنگ کا نظام بنیادی حیثیت رکھتا ہے۔

عمران اسماعیل نے نیشنل پولیس اکیڈمی اسلام آباد کے 24 ویں ابتدائی کمانڈ کورس اور 48 ویں خصوصی تربیتی پروگرام کے وفد سے گورنر ہاؤس میں خطاب کیا، وفد کی سربراہی ایڈیشنل آئی جی آپریشنز سندھ ڈاکٹر امیر شیخ کر رہے تھے۔

 اس موقع پر گورنر سندھ کا کہنا تھا کہ جرائم پر قابو پانے کے لیے پولیسنگ کا نظام بنیادی حیثیت رکھتا ہے، ایک پولیس افسر عوام کی جان و مال کی حفاظت، جرائم کی روک تھام، جرائم کے خوف کو کم کرنے اور تمام شہریوں کے معیار زندگی کو بہتر بنا کر مقامی علاقوں میں امن و امان برقرار رکھنے کا کام کرتا ہے۔

ان کا کہنا تھا کہ مساوات اور منصفانہ بنیادوں پر قانون کے نفاذ کے ذریعے نوجوان افسران محکمے کا اچھا امیج بنانے کے لیے اپنی صلاحیتوں کو بروئے کار لائیں، اپنی پیشہ وارانہ صلاحیتوں کا بہترین استعمال کرتے ہوئے انسانیت کی خدمت اور مصیبت میں گرفتار لوگوں کی خلوص نیت سے مدد کریں۔

انہوں نے کہا کہ روز مرہ جرائم کی روک تھام کے لئے ضروری ہے کہ پولیس کی استعداد کار میں اضافہ کیا جانا چاہئے، کمیونٹی پولیسنگ کے فروغ کے لئے عملی اقدامات یقینی بنائے جائیں۔

گورنر سندھ عمران اسماعیل کا مزید کہنا تھا کہ سی پی ایل سی کا ادارہ اچھا کام انجام دے رہا ہے اور مقامی پولیس کو ہر لحاظ سے معاونت فراہم کر رہا ہے، سی پی ایل سی کی رضاکارانہ بنیادوں پر پولیس کے ساتھ ہم آہنگی قابلِ ستائش ہے۔