وزیر اعلیٰ پنجاب سردار عثمان بزدار نے کہا ہے کہ ملک میں صرف ترقی اور عوامی منصوبوں کی سیاست چلے گی۔

سردار عثمان بزدار سے اراکین قومی و صوبائی اسمبلی نے ملاقات کی جس میں منتخب نمائندوں نے وزیر اعلیٰ عثمان بزدار کو اپنے حلقوں کے مسائل سے آگاہ کیا، وزیر اعلیٰ نے مسائل کے حل کیلئے موقع پر ہی احکامات جاری کئے۔

سردار عثمان بزدار کا کہنا تھا کہ 3 برس میں ہر ضلع میں ریکارڈ ترقیاتی کام کرائے، پسماندہ علاقوں کو ترقی کے سفر میں برابر کا شریک کیا ہے، سابق حکومت نے دور دراز علاقوں کو جان بوجھ کر نظر انداز کیا۔

انہوں نے کہا کہ ماضی میں نظر انداز کئے گئے علاقے آج ترقی کر رہے ہیں، 3 برس کے دوران وہ کام کئے جو سابقہ حکومتیں نہ کر سکیں، پی ڈی ایم کا ایجنڈا صرف اورصرف ذاتی مفادات کا تحفظ ہے، اپوزیشن کا بے مقصد احتجاج صرف اپنی ذات کیلئے ہے۔

وزیر اعلیٰ پنجاب سردار عثمان بزدار کا کہنا تھا کہ اپوزیشن کو نہ عوام کا احساس ہے اور نہ ملک کی پرواہ ہے، لانگ مارچ کا شوشہ چھوڑنے والے پاکستان کی ترقی کا سفر روکنا چاہتے ہیں، ملک میں صرف ترقی اور عوامی منصوبوں کی سیاست چلے گی۔

واضح رہے کہ وزیر اعلیٰ پنجاب سردار عثمان بزدار سے ملاقات کرنے والوں میں اراکین قومی اسمبلی حاجی امتیاز احمد، سید فیض الحسن شاہ، اراکین صوبائی اسمبلی گلریز افضل چن اور محمد طارق تارڑ شامل تھے۔