وزیر اعلیٰ پنجاب سردار عثمان بزدار نے کہا ہے کہ نیا پاکستان صحت کارڈ کے ذریعے ہر خاندان 10 لاکھ روپے تک سالانہ مفت علاج کی سہولت میسر ہوگی۔

سردار عثمان بزدار کی زیر صدارت اجلاس ہوا جس میں وزیر اعلیٰ پنجاب نے صوبے میں جاری ہیلتھ پراجیکٹس کو جلد از جلد مکمل کرنے کا حکم دیا، ان کا کہنا تھا کہ شعبہ صحت میں جاری منصوبوں کی تکمیل سے شہریوں کو علاج معالجے کی سہولت میں بہتری آئے گی۔

انہوں نے کہا کہ یونیورسل ہیلتھ انشورنس پروگرام کے تحت نیا پاکستان صحت کارڈ پنجاب کے ہر شہری کو ملے گا، نیا پاکستان صحت کارڈ کا اجراء جنوری سے لاہور ڈویژن سے کیا جا رہا ہے۔

وزیر اعلیٰ پنجاب کا کہنا تھا کہ 31 مارچ تک نیا پاکستان صحت کارڈ راولپنڈی، فیصل آباد، ملتان، بہاولپور، گوجرانوالہ اور سرگودھا ڈویژن میں بھی لانچ کر دیا جائے گا، یونیورسل ہیلتھ انشورنس پروگرام پر 3 برس میں تقریباً 400 ارب روپے خرچ کئے جائیں گے۔

انہوں نے کہا کہ یونیورسل ہیلتھ انشورنس پروگرام تحریک انصاف کی حکومت کا تاریخ ساز فلاحی اقدام ہے، نیا پاکستان صحت کارڈ کے ذریعے ہر خاندان 10 لاکھ روپے تک سالانہ مفت علاج کی سہولت میسر ہوگی۔

ان کا کہنا تھا کہ صحت عامہ کی سہولتوں کو بہتر بنانا حکومت کی پہلی ترجیح ہے، ہیلتھ کیئر سسٹم کے روایتی نظام کو بدلنے کیلئے اصلاحات پر عمل درآمد کو یقینی بنایا جا رہا ہے، ہیلتھ سیکٹر میں اصلاحات کا مقصد عوام کو معیاری، بہترین اور جدید طبی سہولتوں کی فراہمی ہے۔

عثمان بزدار نے کہا کہ ہسپتالوں میں دکھی انسانیت کے زخموں پر مرہم رکھنے کے لئے محنت اور جذبے سے کام کرنا ہو گا، شعبہ طب ایک مقدس پیشہ ہے اور مسیحائی کا درجہ رکھتا ہے، مسیحائی کے پیشے سے وابستہ لوگ دین اور دنیا دونوں کماتے ہیں۔

انہوں نے کہا کہ کسی کے زخموں پر مرہم رکھنا نیک کام ہے، بہترین علاج معالجہ عام آدمی کا حق ہے اور یہ حق عوام کو دینے میں کوئی کسر اٹھا نہ رکھی جائے گی، لاہور میں 3 نئی اسٹیٹ آف دی آرٹ ایمرجنسیز بنائی جائیں گی۔

وزیر اعلیٰ پنجاب سردار عثمان بزدار کا مزید کہنا تھا کہ 2022 میں پنجاب میں صحت کے شعبہ میں کئی منصوبے مکمل ہوجائیں گے، دکھی انسانیت کو بہترین ہیلتھ کیئر سسٹم دینا ہمارا مشن ہے۔

واضح رہے کہ صوبائی وزیر صحت ڈاکٹر یاسمین راشد، پرنسپل سیکرٹری وزیر اعلیٰ، سیکرٹری سپیشلائزڈ ہیلتھ کیئر اینڈ میڈیکل ایجوکیشن، سیکرٹری پرائمری و سکینڈری ہیلتھ اور متعلقہ حکام نے اجلاس میں شرکت کی۔