سال 2021 گزشتہ سال کی نسبت مختلف جذبات سے لبریز تھا۔ ایک طرف جہاں نسل انسانی کی ترقی نے دو قدم آگے بڑھائے، تو دوسری جانب کچھ واقعات نے ہمیں اپنے مستقبل کے بارے میں فکر مند کر دیا۔

2021 کی سب سے بڑی خبروں میں دنیا کی قدیم ترین جمہوریت میں امید کی واپسی اور دنیا کی سب سے تباہ حال قوموں میں سے ایک میں اس کا غائب ہونا شامل ہے۔

یہ بھی دھیان میں رکھنا چاہئیے کہ گزشتہ سال جنم لینے والی عالمی وبا کووڈ 19 نے کئی اشکال اور مزید مہلک اقسام کے ساتھ دوبارہ سر اٹھایا۔

سیاست، سائنس اور خلائی ٹیکنالوجی کی دنیا سے لے کر قدرتی آفات اور بغاوتوں تک، یہ وہ کہانیاں تھیں جنہوں نے دنیا کو متاثر کیا بلکہ مستقبل قریب میں ہونے والی پیش رفت پر بھی نقش چھوڑے ہیں۔

تو چلئے سال 2021 کی سب سے بڑی چند اہم خبروں پر ایک نظر ڈالتے ہیں۔

6 جنوری: یو ایس کیپیٹل پر دھاوا

سابق امریکی صدر ڈونلڈ ٹرمپ کے حامیوں نے امریکی صدارتی انتخابات 2020 میں ان کی موجودہ امریکی صدر جو بائیڈن کے ہاتھوں شکست کے بعد امریکی دارالحکومت میں کیپیٹل ہل کا محاصرہ کر لیا تھا۔

حملے کے وقت انتخابات کے نتائج کی توثیق کے لیے کیپیٹل کے اندر کانگریس کا مشترکہ اجلاس جاری تھا۔ فسادیوں نے سیکیورٹی اہلکاروں پر حملہ کیا، دفاتر میں لوٹ مار کی اور کیپیٹل میں توڑ پھوڑ کی۔

اس حملے میں افسر برائن سکنک سمیت پانچ افراد ہلاک ہوئے۔ فیڈرل بیورو آف انویسٹی گیشن (ایف بی آئی) نے کیپٹل کے محاصرے کو “ڈومیسٹک ٹیرر ازم” قرار دیا۔

رپورٹ کے مطابق ہنگامہ آرائی کرنے والوں کو ٹرمپ نے ترغیب دی تھی، جس کے لیے ایوان نمائندگان نے ان کا مواخذہ کیا تھا۔ اگرچہ ٹرمپ کو سینیٹ نے بری کر دیا، لیکن وہ پہلے امریکی صدر ہیں جن کا دو بار مواخذہ کیا گیا۔

20  جنوری: جو بائیڈن امریکی صدر، کملا ہیرس نائب صدر مقرر

ڈیموکریٹک پارٹی کے رہنما جوزف روبینیٹ بائیڈن المعروف جو بائیڈن نے نومبر 2020 میں ہونے والے صدارتی انتخابات میں کامیابی حاصل کی، جو امریکی تاریخ کے سب سے متنازع انتخابات میں سے ایک تھے۔ انہوں نے 20 جنوری 2021 کو ریاستہائے متحدہ امریکہ کے 46 ویں صدر کی حیثیت سے حلف اٹھایا۔

اس تقریب میں، انتخابات کے دوران بائیڈن کی رننگ ساتھی، کملا ہیرس نے پہلی خاتون، پہلی سیاہ فام امریکی، اور امریکہ کی پہلی جنوبی ایشیائی امریکی نائب صدر کے طور پر حلف اٹھایا۔

گلوکارہ لیڈی گاگا اور جینیفر لوپیز نے افتتاحی تقریب میں اپنے فن کا مظاہرہ کیا، لیکن اس دن کی اسٹار نیشنل یوتھ پوئٹ انعام یافتہ امندا گورمین تھیں، جن کی متاثر کن نظم The Hill We Climb  نے دنیا بھر میں ہیڈلائنز بنائیں۔

ہیرس نائب صدر بننے سے پہلے کیلیفورنیا سے امریکی سینیٹر رہ چکی ہیں۔ وہ سان فرانسسکو کی ڈسٹرکٹ اٹارنی اور کیلیفورنیا کی اٹارنی جنرل بھی تھیں۔

دریں اثنا، بائیڈن 2008 سے 2016 تک اوباما کے دور میں نائب صدر رہ چکے ہیں۔

یکم فروری: میانمار میں بغاوت

فروری کے آغاز میں ایک ڈرامائی اقدام نے دنیا اور میانمار کے لوگوں کو اچانک حیران کر دیا۔

طاقتور فوج، جسے Tatmadaw کے نام سے جانا جاتا ہے، نے یکم فروری کی صبح بغاوت کرتے ہوئے جنوب مشرقی ایشیائی ملک میانمار پر قبضہ کر لیا۔

ملٹری حکومت جونٹا نے 2020 کے عام انتخابات، جو آنگ سان سوچی کی نیشنل لیگ فار ڈیموکریسی (NLD) پارٹی نے بھاری اکثریت سے جیتے تھے، کو غلط قرار دیا تھا۔

 Tatmadaw کے سربراہ، سینئر جنرل من آنگ ہلینگ نے ایک سال کے لیے ایمرجنسی کا اعلان کیا ہے۔ جس کے بعد ممکنہ طور پر وہ خود کو وزیر اعظم نامزد کریں گے۔

صدر ون مائینٹ اور سوچی سمیت کئی وزراء اور دیگر اعلیٰ حکام کو جونٹا نے حراست میں لے لیا۔ اس کے بعد مظاہرے ہوئے، لیکن فوجی کریک ڈاؤن ظالمانہ تھا، جس کے نتیجے میں بچوں سمیت 700 سے زائد افراد ہلاک ہوئے۔

سوچی کو چھ  دسمبر فوج کی طرف سے تقریباً درجن بھر الزامات کے ساتھ دو سال قید کی سزا سنائی گئی۔

24 فروری: COVAX کے ویکسین شیئرنگ پروگرام کا آغاز

COVAX نامی عالمی ویکسینیشن مہم جس کا مقصد دنیا بھر میں ویکسین کی مساوی تقسیم ہے، کا آغاز گھانا کو ایسٹرا زینیکا ویکسین کی چھ لاکھ خوراکوں کی ترسیل سے ہوا۔

کوویکس پروگرام کو  Gavi، ویکسین الائنس، کولیشن فار ایپیڈیمک پری پئیرڈنس انوویشنز  (CEPI)، WHO، اور کلیدی ڈیلیوری پارٹنر یونیسیف نے مربوط کیا ہے۔

یہ پروگرام تحقیق کو سپورٹ کرتا ہے، قیمتوں پر بات چیت کرتا ہے اور تمام شریک ممالک کے لیے ویکسین تک مساوی رسائی کو یقینی بناتا ہے۔ COVAX کا مقصد 2021 کے آخر تک 2 بلین خوراکیں فراہم کرنا ہے۔

11 مارچ: پہلے ڈیجیٹل NFT پر مبنی آرٹ ورک کی نیلامی

ایوری ڈیز: دی فرسٹ 5000 ڈیز نامی NFT پر مبنی آرٹ ورک، بیپل نامی امریکی فنکار جن کا اصل نام مائیک وِنکیل مین ہے، نے کرسٹیز میں 69 ملین امریکی ڈالر میں نیلام کیا۔

یہ ڈیجیٹل آرٹ ورک کی دنیا میں اب تک کی سب سے زیادہ قیمت پر ہونے والی نیلامی تھی، اور یہ نیلام گھر کی طرف سے فروخت کیا جانے والا پہلا خالصتاً NFT پر مبنی آرٹ تھا۔

کرسٹیز کے مطابق، آرٹ ورک کی فروخت نے بیپل کو “ٹاپ تھری سب سے مہنگے زندہ فنکاروں” کی فہرست میں شامل کردیا۔

اس این ایف ٹی کے مالک میٹاکوون، بعد میں ایک ہندوستانی NFT  کلکٹر اور بلاک چین کاروباری وگنیش سندریسن کے طور پر سامنے آئے۔

23 تا 29  مارچ: کارگو جہاز کا نہر سوئز میں پھنسنا

ایور گیون نامی 400 میٹر لمبا کارگو جہاز 23 مارچ کو تیز ہواؤں کی وجہ سے تنگ نہر سوئز میں ٹیڑھا ہوکر پھنس گیا۔

جہاز چھ دن تک پھنسا رہا، جس کی وجہ سے نہر کے دونوں سروں پر 400 سے زیادہ جہازوں کا “ٹریفک جام” ہوا۔

اس رکاوٹ کا بین الاقوامی تجارت پر بدترین اثر پڑا۔ Lloyd’s List  کے مطابق، رکاوٹ کی وجہ سے روزانہ کی بنیاد پر 9.6 بلین امریکی ڈالر کی تجارت کا نقصان ہورہا تھا۔

جہاز کے پھنسے ہوئے ہر دن کے لیے نہر سوئز کو 14-15 ملین امریکی ڈالر کی آمدنی کا نقصان ہوا۔ جرمن انشورنس کمپنی الیانز نے اندازہ لگایا کہ رکاوٹ نے عالمی سالانہ ترقی کو 0.2 سے 0.4 فیصد پوائنٹس تک کم کیا۔

Ever Given  کو مصری حکام نے قبضے میں لے لیا تھا اور اسے تین ماہ بعد مالکان اور بیمہ کنندگان کے ساتھ معاوضے کے معاہدے کے بعد جانے کی اجازت دی گئی تھی۔

9  اپریل: پرنس فلپ، ڈیوک آف ایڈنبرا کا انتقال

برطانوی شاہی خاندان سے تعلق رکھنے والے پرنس فلپ، ڈیوک آف ایڈنبرا اپنی 100ویں سالگرہ کے چند ہفتوں بعد ہی ونڈسر کیسل، ونڈسر، انگلینڈ میں انتقال کر گئے۔

دی ٹیلی گراف کے مطابق، ان کے ڈیتھ سرٹیفکیٹ میں موت کی وجہ “بڑھاپے” کو بتایا گیا تھا۔

شہزادہ فلپ اپنی موت کے وقت برطانوی شاہی خاندان کے سب سے پرانے مرد رکن اور برطانوی تاریخ میں سب سے طویل عرصے تک خدمات انجام دینے والے شاہی ساتھی تھے۔

یونان اور ڈنمارک کے شہزادہ اینڈریو اور شہزادی ایلس کے بیٹے پرنس فلپ 10 جون 1921 کو کورفو، یونان میں پیدا ہوئے۔

انہوں نے دوسری جنگ عظیم کے دوران رائل نیوی کے ساتھ خدمات انجام دیں۔ جب جنگ ختم ہوئی تو انہوں نے یونانی اور ڈنمارک دونوں تختوں پر اپنا حق چھوڑ دیا۔

1947  میں، انہوں نے شہزادی الزبتھ (اب ملکہ الزبتھ  دوئم) سے شادی کی، جن سے بشمول چارلس، پرنس آف ویلز ان کے چار بچے تھے۔

شہزادہ فلپ نے 1952 میں ملکہ الزبتھ دوئم کے تخت پر فائز ہونے کے بعد سے 22 ہزار 220 عوامی مصروفیات میں حصہ لیا اور 2017 میں سرکاری شاہی فرائض سے سبکدوش ہوئے۔

13 جون: اسرائیلی وزیراعظم بنجمن نیتن یاہو عہدے سے فارغ

اسرائیل کی پارلیمنٹ کنیسٹ میں ہونے والی ووٹنگ میں پارٹیوں کے اتحاد کو ملک میں حکومت بنانے کا موقع ملا، جس سے ملک کے سب سے طویل عرصے تک منسب پر فائز رہنے والے وزیر اعظم بنجمن نیتن یاہو کے 12 سالہ دور حکومت کا مؤثر طریقے سے خاتمہ ہوا۔

اتحادی جماعتوں کے درمیان اقتدار کی تقسیم کے معاہدے کے ایک حصے کے طور پر نفتالی بینیٹ، نیتن یاہو کی جگہ پہلے دو سالوں کے لیے وزیر اعظم کے عہدے پر فائز ہوئے۔

جبکہ یائر لاپید حکومتی مدت کے بقیہ دو سال کے لیے وزیر اعظم بنیں گے۔

ووٹ نے اسرائیل میں سیاسی غیر یقینی صورتحال کے خاتمے کو بھی یقینی بنایا، جس نے 2019 کے بعد سے چار عبوری انتخابات دیکھے۔

17  جون: چینی خلا باز پہلی بار تیانگونگ خلائی اسٹیشن روانہ

نی ہیشینگ، لیو بومنگ اور تانگ ہونگبو نامی تین چینی خلابازوں کو لانگ مارچایف ٹو راکٹ کے ذریعے جیوکوان سیٹلائٹ لانچ سینٹر سے گوبی صحرا میں تیانگونگ خلائی اسٹیشن کے لیے روانہ کیا گیا۔

جو اُس خلائی اسٹیشن میں داخل ہونے والے ملک کے پہلے اشخاص بن گئے جو چین کی طرف سے زمین سے 380 کلومیٹر اوپر خلا میں تعمیر کیا جا رہا ہے۔ تینوں خلاباز خلائی اسٹیشن کے بنیادی ماڈیول Tianhe میں داخل ہوئے اور زمین پر موجود مبصرین کو فوجی سلامی دی۔

عملے کا یہ مشن چین کا پانچ سالوں میں پہلا اور اس وقت کا سب سے طویل مشن تھا، جو تین ماہ تک جاری رہا۔ اس کے بعد اکتوبر میں عملے کا دوسرا مشن تھا۔

تیانگونگ خلائی اسٹیشن پہلا طویل مدتی خلائی اسٹیشن ہے جسے چین اپنے پچھلے دو تیانگونگ مشنوں کی کامیابیوں کے بعد تعمیر کرنے کا ارادہ رکھتا ہے۔

 23  جولائی تا 8 اگست: 2020 ٹوکیو اولمپکس کا 2021 میں انعقاد

ٹوکیو میں 2020 کے سمر اولمپکس وبائی امراض کی وجہ سے 24 جولائی سے 9 اگست 2020 کے فریم میں ایک سال کی تاخیر کے بعد منعقد ہوئے۔ یہ تاریخ میں پہلی بار تھا کہ اولمپک گیمز کو دوبارہ شیڈول کیا گیا۔

یہ گیمز ٹورنامنٹ کے دوران COVID-19 کے پھیلاؤ کو روکنے کے لیے قواعد و ضوابط کے ایک سیٹ بشمول ٹیسٹنگ اور قرنطینہ کے تحت منعقد کیے گئے تھے۔

ٹوکیو میں ایمرجنسی کا اعلان ہونے کے باعث مقامات پر کسی تماشائی کو آنے کی اجازت نہیں تھی۔

مذکورہ اولمپکس میں نئے کھیل متعارف کروائے گئے۔ ان میں اسکیٹ بورڈنگ، سرفنگ، اسپورٹ کلائمبنگ، کراٹے، 3×3 باسکٹ بال  اور فری اسٹائل BMX شامل تھے۔

ٹوکیو اولمپکس میں بیس بال اور سافٹ بال نے بھی واپسی کی۔

مخلوط صنفی ٹیم ایونٹس کو کچھ موجودہ کھیلوں میں شامل کیا گیا تھا۔

39 طلائی اور کل 113 تمغوں کے ساتھ، امریکہ تمغوں کی تعداد میں سرفہرست رہا اور اس کے بعد عوامی جمہوریہ چین نے 38 سونے سمیت 88 تمغے جیتے۔

تیسرے نمبر پر رہنے والے جاپان نے اولمپکس میں 27 طلائی اور کل 58 تمغوں کے ساتھ اپنی بہترین کارکردگی پیش کی۔

15 اگست: کابل پر طالبان کا قبضہ

طالبان، جو افغانستان کی منتخب حکومت اور سیکیورٹی فورسز کے خلاف طویل جنگ لڑ رہے تھے، صدر اشرف غنی کے ملک سے فرار ہونے کے چند گھنٹوں بعد ہی دارالحکومت پر قابض ہونے میں کامیاب ہوگئے۔

امریکی صدر جو بائیڈن نے کابل کے زوال کے ایک دن بعد، طالبان کی پیش قدمی کے بارے میں واشنگٹن کی واضح انٹیلی جنس ناکامی کو تسلیم کرتے ہوئے کہا، “سچ یہ ہے کہ یہ ہماری توقع سے زیادہ تیزی سے ہوا۔”

اس کے بعد افغانستان کی مقامی آبادی کے انخلاء کے دلخراش مناظر سامنے آئے۔

ایک تصویر جس نے دنیا کی توجہ اپنی طرف مبذول کرائی تھی، اس میں بے بس افغانوں کو دکھایا گیا تھا کہ جب وہ ٹیک آف کے دوران امریکی فضائیہ کے C-17 گلوب ماسٹر کے لینڈنگ گیئر کو پکڑنے کی کوشش کر رہے تھے، جن میں سے کچھ موت کے منہ میں چلے گئے۔

جب سے طالبان نے اقتدار سنبھالا، خواتین کو مبینہ طور پر لازمی طور پر حجاب پہننے پر مجبور کیا گیا، مردوں کے شانہ بشانہ تعلیم سے روکا کیا گیا اور دیگر پابندیوں کے علاوہ کام سے دور رہنے کو کہا گیا۔

دریں اثنا، 30 اگست کو امریکی فوج کے 82 ویں ایئر بورن ڈویژن کے میجر جنرل کرس ڈوناہو اس وقت افغانستان چھوڑنے والے آخری امریکی فوجی بن گئے، جب وہ ملک سے باہر جانے والے آخری C-17  پر سوار ہوئے۔

اس کے ساتھ ہی دو دہائیوں بعد کابل میں امریکی مشن کا خاتمہ ہوا، جس میں 6,000 امریکیوں اور 100,000 افغانوں کی جانیں گئیں۔

فیس بک فائلوں کا اجراء

ستمبر میں، وال اسٹریٹ جرنل نے تحقیقاتی رپورٹس کا ایک سلسلہ شائع کیا جسے “دی فیس بک فائلز” کہا جاتا ہے۔

یہ کمپنی کے ایک “وسل بلوور” یعنی مخبر کے ذریعے جاری کردہ دستاویزات پر مبنی انکشافات تھے۔

ان فائلوں میں فیس بک اور اس کے ذیلی اداروں کے خلاف لگائے گئے کچھ انتہائی گھناؤنے الزامات کی تصدیق کی گئی ہے ، جن میں نوعمر لڑکیوں پر منفی اثرات، نفرت انگیز تقریر اور غلط معلومات کا وسیع پیمانے پر پھیلاؤ اور سنسرشپ کے بارے میں ایڈہاک فیصلے شامل ہیں۔

شاید سب سے زیادہ تشویشناک بات یہ ہے کہ مذکورہ خطرات اور دیگر انتظامی مسائل اندرونی طور پر سب کو معلوم تھے اور اچھی طرح سے ڈاکیمونٹڈ بھی تھے۔

ڈیٹا سائنس دان اور سابق فیس بک پروڈکٹ مینیجر فرانسس ہوگن نے 16 ستمبر کو “60 منٹس” کے انٹرویو میں اپنی شناخت وِسل بلور کے طور پر ظاہر کی۔

ہوگن نے 5 اکتوبر کو کانگریس کے سامنے گواہی دیتے ہوئے کہا کہ فیس بک کو دنیا بھر کے کمزور گروپوں کو شعوری طور پر نقصان پہنچانے سے روکنے کے لیے ضوابط کی ضرورت ہے۔

کانگریس کے سامنے ایک زیادہ متنازع دوسری پیشی میں، ہوگن نے یکم دسمبر کو ہاؤس انرجی اینڈ کامرس پینل کے سامنے گواہی دی۔

اس کی گواہی اور اس کے بعد قانون سازوں کی طرف سے پوچھ گچھ نے انکشاف کیا کہ ٹیک ریگولیشن کا مسئلہ پارٹی لائنوں میں تیزی سے تقسیم ہے۔

اسکینڈل سامنے آنے کے فوراً بعد فیس بک کے چیف ایگزیکیوٹیو آفیسر مارک زکر برگ نے بطور کمپنی فیس بک کا نام تبدیل کر کے “میٹا” کردیا۔

 اس کے ساتھ ہی ورچوئل رئیلیٹی پر مبنی ایک بڑے پروجیکٹ “میٹاورس” کا اعلان کیا، جس کے لیے کئی ہزار افراد کو بھرتی کیا گیا۔