چئیرمین نیب کےلئے اپوزیشن اپنے امیدواروں کے نام آج فائنل کرے گی۔

ذرائع کے مطابق اپوزیشن کی اسٹیرنگ کمیٹی نے تمام جماعتوں سے آج نام دینے کی درخواست کی ہے۔

اسٹیرنگ کمیٹی میں شامل ہر جماعت کے تجویز کردہ ناموں سے اتفاق رائے سے نام تجویز کیا جائے گا۔

اسٹیرنگ کمیٹی کا اجلاس آج دوبارہ ہوگا، جس میں چیئرمین نیب کےلیے تین نام تجویز کیے جایئں گے، ان ناموں کو قومی اسمبلی میں اپوزیشن لیڈر شہباز شریف کو بھجوایا جائے گا۔

 متعلقہ خبر: نئے چئیرمین نیب کی تقرری کا معاملہ

مسلم لیگ ن کے صدرشہباز شریف یہ نام صدر مملکت عارف علوی کو تحریری طور پر بھجوائیں گے۔

ذرائع کے مطابق ن لیگ اور پیپلز پارٹی اعلیٰ شہرت کے حامل ریٹائرڈ  بیورو کریٹ کا نام دینے پر غور کررہی ہیں۔

 جے یو آئی ف و دیگر بیورو کریٹ کے ساتھ ریٹائر جج کے نام پر بھی مشاورت کررہی ہیں۔

چئیرمین نیب کی تقرری

ایوان صدر کی جانب سے دو روز قبل چئیرمین نیب کی تقرری کے لیے آئین کے تحت قومی اسمبلی میں لیڈر آف دی ہاؤس، وزیراعظم عمران خان اور قومی اسمبلی میں اپوزیشن لیڈر شہباز شریف کو خط لکھا تھا۔

اس خط میں ایوان صدر نے وزیراعظم عمران خان اور اپوزیشن لیڈر شہباز شریف سے نئے چئیرمین نیب کے نام مانگے اور دونوں سے درخواست کی کہ وہ ایسے نام ایوان صدر کو بھجوائیں جو کہ چیئرمین نیب کےلیے طے شدہ طریقہ کار اور قواعد و ضوابط پر پورا اتریں۔

نئے نام آنے کے بعد صدر حکومت اور اپوزیشن کے اتفاق رائے سے نئے چئیرمین نیب کا انتخاب کریں گے۔

اگر وزیراعظم اور اپوزیشن لیڈر کے درمیان کسی بھی ایک نام پر اتفاق نہ ہوا تو پھر صدر یہ معاملہ پارلیمانی کمیٹی کو بھجوا دینگے جس میں حکومت اور اپوزیشن اراکین کی تعداد برابر ہوگی۔

صدر مملکت وہ نام بھی پارلیمانی کمیٹی کے حوالے کر دینگے جو کہ وزیراعظم اور اپوزیشن لیڈر نے تجویز کیے ہونگے۔

موجودہ چئیرمین نیب جاوید اقبال 8 اکتوبر کو اپنی چار سالہ مدت ملازمت مکمل کرچکےہیں۔

موجودہ چئیرمین نیب کو صدارتی آرڈیننس کے تحت نئے چئیرمین کی تعیناتی تک کام کرنے کی ہدایت کی گئی ہے۔